მსოფლიო

აშშ-მ ახალი სანქციებით ირანის ავიაკომპანიებს დაუმიზნა

აშშ-მ ირანს ახალი სანქციები დაუწესა. აშშ-ის სახაზინო დეპარტამენტის ინფორმაციით, ვაშინგტონის შავ სიაში მოხვდა 9 ირანული და თურქული ავიაკომპანია, რომლებიც Mahan Air-თან and Meraj Air-თან არიან დაკავშირებულები; ასევე პირები, რომლებიც, ვაშინგტონის მონაცემებით, ხელს უწყობდნენ თეირანის სამხედრო ოპერაციებს საზღვარგარეთ.

კერძოდ, სანქციები დაუწესდა ირანულ ავიაკომპანიებს Dena Airways-ს, Blue Airways-ს, ასევე თურქულ ავიაკომპანიებს – Trigron Lojistik-ს, RA Havacilik-ს, 3G Lojistik-ს და Otik Aviation-ს.

შეზღუდვები დაუწესდა ირანის ორ და თურქეთის ერთ მოქალაქეს.

სახაზინო დეპარტამენტის განცხადებით, ეს კომპანიები და პირები დაკავშირებულები არიან საზღვარგარეთ იარაღის, აღჭურვილობისა და სახსრების მიწოდებასთან ირანის სახელმწიფო ტერორის ოპერაციების ხელშეწყობის მიზნით.

ცნობისთვის, 8 მაისს დონალდ ტრამპმა ირანთან ბირთვული შეთანხმებიდან გასვლის შესახებ განაცხადა.