მსოფლიო

აშშ-ის სახელმწიფო დეპარტამენტმა რუსეთის მთავრობას ბორის ნემცოვის მკვლელობაში დამნაშავე პირების დასჯისკენ მოუწოდა

აშშ-ის სახელმწიფო დეპარტამენტმა მოუწოდა რუსეთის მთავრობას, უზრუნველყოს რუსი ოპოზიციონერის, ბორის ნემცოვის მკვლელობის ყველა ორგანიზატორისა და დამკვეთების დასჯა. ამის შესახებ დეპარტამენტის პრესმდივანმა ხიზერ ნოიერტმა თქვა.

„რადგან ბორის ნემცოვის სიცოცხლესა და საქმეებს პატივს ვცემთ,კიდევ ერთხელ მოვუწოდებთ რუსეთის მთავრობას, დაიცვას თავისი ვალდებულებები ადამიანის საყოველთაო უფლებების დაცვისა და მხარდაჭერისთვის, მათ შორის სიტყვის თავისუფლების, მშვიდობიანი შეკრების თავისუფლებისა და ასოციაციების შექმნის თავისუფლების სფეროში“, - თქვა ნოიერტმა.

განცხადებაში აღნიშნულია, რომ ბორის ნემცოვის მაგალითი „რუს ხალხს შთააგონებს“, რათა ჩაერთოს ბრძოლისთვის თავისუფალი და დემოკრატიული ხელისუფლებისთვის.

გუშინ ასევე მოსკოვში ბორის ნემცოვის საპატივცემულოდ მსვლელობა გაიმართა. რუსეთის შსს-ის ინფორმაციით, მასში მონაწილეობა მიიღო 4.500-მა ადამიანმა, ზოგი რუსული მედიასაშუალება კი 15 000 კაცზე საუბრობს. პეტერბურგში გამართულ აქციაზე კი ერთი მამაკაცი დააკავეს, რომელსაც უკრაიული დროშა ეკავა.

რუსი ოპოზიციონერი ბორის ნემცოვი მოსკოვის ცენტრში მოკლეს 2015 წლის 28 თებერვალს. მოსკოვის საოლქო სამხედრო სასამართლომ ამ საქმეში ბრალდებული 5 პირი დამნაშავედ ცნო და 11-დან 20 წლამდე თავისუფლების აღკვეთა მიუსაჯა. გამოძიება სავარაუდო დამკვეთად ბატალიონ „სევერის“ ყოფილ ოფიცერს, რუსლამ მუხუდინოვს მიიჩნევს, რომელზეც საერთაშორისო ძებნაა გამოცხადებული.