მსოფლიო

აშშ ირანის ბირთვული შეთანხმების პირობებს დაიცავს, თუმცა არ მოითმენს თეირანის სახიფათო და დესტაბილიზაციის გამომწვევ ქმედებებს - ნიკი ჰეილი

გაეროში აშშ-ის წარმომადგენელი ნიკი ჰეილი გამოეხმაურა დონალდ ტრამპის განცხადებას, რომლის მიხედვით ირანთან გაფორმებული 2015 წელს ბირთვული შეთანხმება უცვლელად რჩება და თეირანზე დაკისრებული სანქციები არ აღდგება.

„პრეზიდენტმა გადამწყვეტი ნაბიჯი გადადგა, რითაც ნათელი გახდა, რომ შეერთებული შტატები ირანის ბირთვული შეთანხმების პირობებს დაიცავს, თუმცა არ მოითმენს ირანის სახიფათო და დესტაბილიზაციის გამომწვევ ქმედებებს“,-განაცხადა ჰეილიმ.

აშშ-ის წარმომადგენელმა გაეროში იმედი გამოთქვა, რომ ამ საკითხს სხვა ქვეყნებიც დაუჭერენ მხარს.

„ჩვენ ვაპირებთ გაეროში ახალი საერთაშორისო თანამშრომლობის მიღწევას, რათა გავამკაცროთ ირანის სარაკეტო პროგრამის საწინააღმდეგო საქმიანობა, გავაძლიეროთ შეიარაღების ემბარგო, დავძლიოთ ირანის მიერ ტერორიზმის დაფინანსება, ასევე ნათელი მოვფინოთ ამ ქვეყანაში ადამიანის უფლებათა დარღვევის ფაქტებს. ყველა ამ ნაბიჯის გადადგმა ირანთან ბირთვული შეთანხმების ფარგლებს გარეთ შეიძლება. ჩვენ არ უნდა მივცეთ ირანს უფლება, რომ ბირთვული შეთანხმების საფარქვეშ დაარღვიოს გაეროს რეზოლუციები და ყველა საერთაშორისო ნორმა“, - აღნიშნა ჰეილიმ.