კომენტარი

არც „ომეგასთან“ დაკავშირებით არასოდეს არაფერი მსმენია, ბიზნესმენ ზაზა ოქუაშვილსაც არ ვიცნობ - ანზორ ჩუბინიძე

სახელმწიფო დაცვის სპეციალური სამსახურის ხელმძღვანელი ანზორ ჩუბინიძე ტელეკომპანია „იბერიასთან“ დაკავშირებით მის წინააღმდეგ გაჟღერებულ ყველა ბრალდებას უარყოფს.

როგორც ჩუბინიძემ ჟურნალისტებს განუცხადა, ტელეკომპანია „იბერიას“ შესახებ ბავშვობაში იცოდა და ახლა გაიგო მხოლოდ მას შემდეგ, რაც ეს საკითხი ამოტივტივდა.

„იბერია“ ბავშვობაში მახსოვს და ახლა გავიგონე, რომ ასეთი ტელეკომპანია არის, ბოდიშს ვიხდი.
სამარცხვინოც კი არის, რომ ამ საკითხზე კომენტარი გავაკეთო. არანაირი კავშირი არ მქონია და არ მექნება ასეთ დალაგების მექანიზმებთან. როცა პროკურატურაში გაირკვევა ეს საკითხი, დიდი ალბათობით ჩემთან მიმართებაში კითხვები არც იქნება. სიგარეტის მომხმარებელი არ ვარ და არც „ომეგასთან“ დაკავშირებით არასოდეს არაფერი მსმენია. ბიზნესმენ ზაზა ოქუაშვილსაც არ ვიცნობ. მთელ ჩემს სამსახურეობრივ კარიერას ვდებ სასწორზე და ვამბობ - არანაირ მსგავს გარიგებაში მონაწილეობა არ მიმიღია. მზად ვარ, მივიდე ნებისმიერ ადგილას და გავცე ნებისმიერ კითხვას პასუხი“, - განაცხადა ანზორ ჩუბინიძემ

როგორც ჩუბინიძე განმარტავს, მიუხედავად ჩანაწერების გავრცელებისა, მას სპორტის ყოფილ მინისტრ ლევან ყიფიანთან საუბარი არ ჰქონია და არაფრის გარკვევას არ გეგმავს. მისივე თქმით, ამ საკითხზე არანაირი კომუნიკაცია არ ჰქონია არც ყოფილ პრემიერ ბიძინა ივანიშვილთან.

ამასთან, ჩუბინიძის განცხადებით, ამ „აბდაუბდაზე თავის მართლებას არ გეგმავს“.

"მე ვმუშაობ დაცვისა და უსაფრთხოების სფეროში და ვფიქრობ, რომ ვარ ძალიან კომპეტენტური. საფინანსო სფეროში არ ვმუშაობ. მე ვფიქრობ, რომ ოქუაშვილის რანგის ბიზნესმენებმა უნდა მოახერხონ და ძალიან კარგად იციან, სად უნდა დაალაგონ სიტუაცია - ეს არის საფინანსო ინსტიტუტი. ძალიან კარგად იციან ამ რანგის მოხელეებმა, ვის და სად უნდა მიმართონ,“-აცხადებს ანზორ ჩუბინიძე.