კომენტარი

არის ინფორმაცია აფგან მუხტარლი „რადიო თავისუფლების“ დაცვის თანამშრომელი იყო, ჟურნალისტი არ არის - ალექსანდრე ჯეჯელავა

საქართველოს ვიცე-პრემიერის, განათლებისა და მეცნიერების მინისტრის, ალექსანდრე ჯეჯელავას განცხადებით, შინაგან საქმეთა სამინისტრომ, აფგან მუხტარლის საქმეზე მოკვლევა დაიწყო.

მინისტრის თქმით, ძალოვან უწყებას აზერბაიჯანელ კოლეგებისგან აქვს ინფორმაცია, რომ მუხტარლიმ საზღავრი უკანონოდ გადაკვეთა.

ამასთან, ჯეჯელავამ ჟურნალისტებს ურჩია ინფორმაციის გადამოწმება, არის თუ არა მუხტარლი ნამდვილად ჟურნალისტი.

„შინაგან საქმეთა სამინისტრომ გაავრცელა განცხადება, გუშინვე დაიწყეს მათ მოკვლევა. მათ შორის აზერბაიჯანელი კოლეგებისგან აქვთ ინფორმაცია, რომ ეს ადამიანი უკანონოდ კვეთდა საზღვარს. ისიც, რომ ჟურნალისტი იყო, ალბათ თქვენც უნდა გადაამოწმოთ, რადგან არის ინფორმაცია, რომ ის იყო რადიო „თავისუფლების“ დაცვის თანამშრომელი, ანუ ჟურნალისტიკასთან რაღაც კავშირი აქვს, მაგრამ უშუალოდ ჟურნალისტი არ არის. მე ვფიქრობ, გამოძიება აუცილებლად დაადგენს რეალობას, სად და რა პირობებში დააკავეს იგი. პრაქტიკულად გამოვრიცხავ იმ ვერსიას, რომელიც არასამთავრობოებმა პირდაპირ ფაქტად წარმოგვიდგინეს, რომ ეს მოხდა თბილისში და მოხდა ძალადობა. თუმცა გამოძიება დაწყებულია სწორედ იმ ბრალდების საფუძველზე, რაც გაჟღერდა. რამდენიმე დღეში ზუსტი ინფორაცია გვექნება“, - განაცხადა ალექსანდრე ჯეჯელავამ.

მონიკა დავლიანიძე