კომენტარი

არჩევნების მეორე ტურში ბრძოლას აუცილებლად ვაპირებთ - ადა მარშანია

„პატრიოტთა ალიანსი“ ბორჯომის ოლქისთვის ადგილობრივი თვითმმართევლობის არჩევნების მეორე ტურში ბრძოლას აპირებს.

ამის შესახებ მედიას პარტიის ერთ-ერთმა წევრმა ადა მარშანიამ განუცხადა.

„ნაციონალური მოძრაობის“ მიერ მეორე ტურის ბოიკოტზე საუბრისას პოლიტიკოსმა აღნიშნა, რომ რაც ნაკლებად მიიღებს „ნაციონალური მოძრაობა“ მონაწილეობას არჩევნებში, მით უფრო სამართლიანი არჩევნები ჩატარდება.

„აუცილებლად ვაპირებთ მეორე ტურში ჩვენ ბრძოლას, ბრძოლას გამარჯვებამდე. რაც შეეხება „ნაციონალური მოძრაობის“ ერთი ფრთის განცხადებას, მივესალმები და მოხარული ვარ, რომ ასეთი განცხადება გააკეთეს. იმიტომ, რომ რაც ნაკლებად მიიღებს, ან საერთოდ არ მიიღებს „ნაციონალური მოძრაობის“ რომელიმე ფრთა, ძველი თუ ახალი, არჩევნებში მონაწილეობას, მით უკეთესი, მით უფრო სამართლიანი და ნორმალური არჩევნები ჩატარდება საქართველოში“,-აღნიშნა ადა მარშანიამ.

ადგილობრივი თვითმმართველობის არჩევნების მეორე ტური 6 ოლქში შედგება. ორ მათგანში - ქუთაისსა და მარტვილში „ნაციონალური მოძრაობა“ არის წარმოდგენილი, თუმცა პარტიამ მეორე ტურში მონაწილეობაზე უარი განაცხადა.

ხაშურსა და ოზურგეთში დამოუკიდებელი დეპუტატები და „ქართული ოცნების“ კანდიდატი მიიღებენ მონაწილოებას.

ბორჯომში - „პატრიოტთა ალიანსის“ და „ქართული ოცნების“ წევრები გავიდნენ მეორე ტურში.

ყაზბეგში კი, ნინო ბურჯანაძის „დემოკრატიული მოძრაობა“, თუმცა „დემოკრატიულ მოძრაობას“ მეორე ტურთან დაკავშირებით განცხადება ჯერჯერობით არ გაუკეთებია.

მონიკა დავლიანიძე