კომენტარი

არ შეიძლება კონკრეტულ მედიასაშუალებას, რომელსაც ფლობ, ამოეფარო და თქვა, რომ მე არ მინდა გადასახადების გადახდა - მამუკა მდინარაძე „იბერიაზე“

საპარლამენტო უმრავლესობის წევრმა, მამუკა მდინარაძემ „ომეგა ჯგუფისა“ და ტელეკომპანია „იბერიას“ დამფუძნებლის, ზაზა ოქუაშვილის ინტერვიუს კომენტირებისას განაცხადა, რომ არ შეიძლება, ბიზნესმენი თავისი მედიასაშუალების გამოყენებით გადასახადების გადახდას თავს არიდებდეს.

„როდესაც ასეთ კამპანიას იწყებს ადამიანი, კონკრეტული ინფორმაციის თქმა და კონკრეტული პირების დასახელება უკვე მისი უფლება კი აღარ არის, არამედ ვალდებულებაა.

იმ ადამიანებმაც, ვინც ამ ამბავში, ამ პიარკამპანიაში არიან გახვეულები, ყველამ თავისი წილი პასუხისმგებლობა უნდა აიღოს თავის თავზე.

არ შეიძლება, კონკრეტულ მედიასაშუალებას, რომელსაც ფლობ, ამოეფარო და თქვა, რომ მე არ მინდა გადასახადების გადახდა. და რაც მთავარია, მედიაპლურალიზმს ამ ქვეყანაში საფრთხე აღარასდროს აღარ დაემუქრება“, -თქვა დეპუტატმა.

ზაზა ოქუაშვილმა „იბერიასთვის“ მიცემულ ვრცელ ინტერვიუში განაცხადა, რომ დაასახელებს იმ მაღალჩინოსნებს, ვინს „ომეგა ჯგუფს“ ფულს სძალავდა.

„აუცილებლად მე დავასახელებ უმაღლეს პირებს, რომლებიც არის და ხელმძღვანელობს ამ ყველაფერს და განაგებს. გავაჟღერებ ყველა გვარს, ყველა სახელს, რაც არ უნდა დიდი იყოს, რაც არ უნდა საშიში იყოს.

იმას ვაზუსტებ, რომ არ გადავუსწრო იურიდიულ პროცესებს, რაც მიმდინარეობს უცხოეთში და რომ მქონდეს მხარდაჭერა შეთანხმებული ჩემი ადვოკატებისგან“, - თქვა ბიზნესმენმა.

მისივე თქმით, „ომეგა“ ითხოვს ვალის რესტრუქტურიზაციას.

„ „ომეგა“ წნეხის ქვეშაა, დეკლარირებული ვალდებულებები გაუჩნდა და ითხოვს, რომ ეს გრაფიკი, რომელზეც სახელმწიფო ვალდებულია ორ თვეში მისცეს, რესტრუქტურიზაციას ვეძახით ჩვენ, და ამას არ აკეთებს სახელმწიფო. დაუკვირდით, რასთან გვაქვს საქმე. სად ხდება ეგრე, გადაიხადოს 50 – 51 მილიონი ორ კვირაში, სად ხდება, ხალხო? ხალხო, გამოვფხიზლდეთ, შევხედოთ, თანაც 50 მილიონში 14, შეიძლება 15 მილიონი არის საურავი. საურავზე საუბრობენ კომპანიაზე, რომელსაც ასეულობით მილიონი დაბანდებული აქვს, მილიარდები ბიუჯეტში აქვს შეტანილი და ამდენი ინვესტიცია. და როდესაც ითხოვს, მომეცი გრაფიკი, ადამიანო, მინისტრო, პრემიერ-მინისტრო, იმის იქით, მომეცი გრაფიკი და დავფარავ, მაგრამ ნუ მაჩერებ და გამიშვი, იმ 8%-ზე მეტი ამაღებინე, რაც მე მეკუთვნის მეტი, არა? “, - განაცხადა ოქუაშვილმა ინტერვიუში.