კომენტარი

არ მინდა ომბუდსმენის ინსტიტუტი გადაიქცეს „კრიმინალების გამპრავებელ კანტორად“ - გიორგი მღებრიშვილი

შს მინისტრი გიორგი მღებრიშვილი სახალხო დამცველის მიერ გავრცელებულ განცხადებას გამოეხმაურა, რომელშიც ომბუდსმენი სამართალდამცველების მიერ პატიმრის წამების შესახებ წერს.

კერძოდ, უჩა ნანუაშვილი ბრალდებულ სერგო მამასახლისის მიმართ პოლიციელების მხრიდან, სავარაუდო, არასათანადო მოპყრობის ფაქტზე მთავარ პროკურორს გამოძიების დაწყების თხოვნით მიმართა.

მინისტრის თქმით, მას არ სურს ომბუდსმენის ავტორიტეტული ინსტიტუტი, გადაიქცეს „კრიმინალების გამპრავებელ კანტორად“.

გიორგი მღებრიშვილი სახალხო დამცველს ურჩევს, ინფორმაციები შინაგან საქმეთა სამინისტროსთან გადაამოწმოს.

„ბრალდებულისგან მსგავსი ჩვენებები არ მიკვირს, ეს არც პირველი ყოფილა და არც ბოლო იქნება. მე უბრალოდ ყოველთვის მაოცებს ომბუდსმენის ასეთი დამოკიდებულება. მას შეეძლო ინფორმაციის გადამოწმება ჩვენთან და მიიღებდა აბსოლუტურად ამომწურავ პასუხს. კარგად მოგეხსენებათ, რომ ვართ აბსოლუტურად გამჭვირვალეები, ობიექტურები, ტრანსფარანტულები ყველა საკითხთან მიმართებაში. უფრო მეტი დაკვირვება და სიფრთხილეა საჭირო, როცა პოლიციელებთან მიმართებაში ვაკეთებთ განცხადებას. არ მინდა, რომ ისეთი ავტორიტეტული ინსტიტუტი, როგორიც ომბუდსმენის ინსტიტუტია, გადაიქცეს „კრიმინალების გამპრავებელ კანტორად“,-აღნიშნა გიორგი მღებრიშვილმა.

მონიკა დავლიანიძე