მსოფლიო

არ გამიკვირდება, თუ უკრაინის მთავრობა ФСБ-ის გენერლად ან პუტინის მეგობრად გამომაცხადებს - მიხეილ სააკაშვილი

საქართველოს ყოფილი პრეზიდენტისა და ოდესის ექს-გუბერნატორის მიხეილ სააკაშვილის ინფორმაციით, უკრაინის მთავრობა მის წინააღმდეგ პროვოკაციებს ამზადებს. ამის შესახებ მან „24 канал“-ს განუცხადა.

„ისინი [უკრაინის მთავრობა] რაღაც პროვოკაციებს ამზადებენ. არ გამიკვირდება, თუ მომდევნო დღეებში აგენტად ან ფედერალური უსაფრთხოების სამსახურის გენერლად, პუტინის საუკეთესო მეგობრად და უკრაინის არეულობის გამომწვევ გეგმად გამომაცხადებენ“, - თქვა სააკაშვილმა.

სააკაშვილის ცნობით, უკრაინის მთავრობამ უკვე მისცა დავალება იუსტიციის სამინისტროს, შეისწავლოს მისი საქართველოში ექსტრადირების პროცედურა. ოდესის ყოფილი გუბერნატორის მტკიცებით, ეს უკრაინის მთავრობას არ დაეხმარება, რადგან სააკაშვილს საკმარისი მხარდაჭერა აქვს უკრაინასა და საქართველოში.

საქართველოს ექს-პრეზიდენტმა აღნიშნა, რომ უკრაინული მხარე პოლონეთის მთავრობაზე ზეწოლას ახორციელებს მის გამო.

სააკაშვილმა მიმართა მთავრობას, დაუშვას მისი მისვლა უკრაინის სასამართლოში.

„მგონი, უფრო ჭკვიანური იქნებოდა, მომეცეს საშუალება, ექსცესებისა და პროვოკაციების გარეშე მივიდე უკრაინულ სასამართლოში. უბრალოდ იურიდიული საქმეები გავაკეთო, დავიცვა საკუთარი თავი, ასევე შევქმნა პრეცედენტი, რომ შესაძლებელია პრეზიდენტის განკარგულების გასაჩივრება და მოგებაც, თუკი მართალი ხარ“, -თქვა სააკაშვილმა.

შეგახსენებთ, 26 ივლისს გავრცელდა ინფორმაცია, რომ მიხეილ სააკაშვილს უკრაინის მოქალაქეობა ჩამოართვეს. ამის მიზეზად მოქალაქეობის მისაღებად შევსებულ დოკუმენტებში შეტანილი არასწორი ინფორმაცია სახელდება.

სააკაშვილმა დააანონსა, რომ 10 სექტემბერს უკრაინაში ჩასვლას აპირებს.

ანა მებურიშვილი