მსოფლიო

არ გაგვიკვირდა - ვაშინგტონში განმარტეს, რატომ არ მიულოცა ტრამპმა პუტინს ხელახალი გაპრეზიდენტება

აშშ-ის პრეზიდენტმა დონალდ ტრამპმა არ მიულოცა ვლადიმერ პუტინს რუსეთის საპრეზიდენტო არჩევნებში გამარჯვება.

ტრამპის პრესმდივანმა ჰოგან გიდლიმ განუმარტა ჟურნალისტებს, რომ პუტინის გამარჯვება ვაშინგტონისთვის სიურპრიზი არ ყოფილა, ხოლო სატელეფონო ზარი კრემლში დაგეგმილი არ ყოფილა.

მან აღნიშნა, რომ ამის მიუხედავად აშშ აპირებს, გააგრძელოს რუსეთთან თანამშრომლობა ყველა შესაძლო სფეროში.

„ჩვენ გავაგრძელებთ რუსეთთან ჩვენი ურთიერთობების განვითარებას, თუმცა პასუხს ვაგებინებთ, თუკი ის ჩვენს ინტერესებს დაემუქრება“, -თქვა გიდლიმ.

დასავლეთის ლიდერები არ ჩქარობენ პუტინთან დაკავშირებას, ამ დროისთვის მეოთხედ გაპრეზიდენტება მას მიულოცეს საფრანგეთის პრეზიდენტმა ემანუელ მაკრონმა და გერმანიის კანცლერმა ანგელა მერკელმა.

კრემლს პუტინის მისალოცად დაუკავშირდნენ ჩინეთის სახალხო რესპუბლიკის ხელმძღვანელი სი ცზინპინი, აზერბაიჯანის, ბელორუსიის, სომხეთის, უნგრეთის, უზბეკეთის, ვენესუელის, თურქმენეთის, ყაზახეთის, ტაჯიკეთის, კუბის, მოლდოვეთისა და ყირგიზეთის პრეზიდენტები, ასევე ოკუპირებული ცხინვალისა და აფხაზეთის დე-ფაქტო ლიდერები.

ევროკავშირმა კი გამოაქვეყნა განცხადება, რომელშიც საუბარია საარჩევნო პროცესის დროს გამოკვეთილ დარღვევებზე, მათ შორისაა კანდიდატების საქმიანობის ცალმხრივად გაშუქება წინასაარჩევნო კამპანიის დროს.

რუსეთის საპრეზიდენტო არჩევნები 18 მარტს ჩატარდა.