მსოფლიო

აქციები დასრულებულია - ირანის ისლამური რევოლუციის გუშაგთა კორპუსის მეთაური

ირანის ისლამური რევოლუციის გუშაგთა კორპუსის მეთაურის, გენერალ მოჰამედ ალი ჯაფარის განცხადებით, ანტისამთავრობო პროტესტები ქვეყანაში დასრულებულია.

„დღეს შეგვიძლია ვთქვათ, რომ ეს 1396 წლის ამბოხი დასრულდა“, -თქვა ჯაფარიმ, რომელმაც ირანული კალენდრით იხელმძღვანელა.

მას არ წარუდგენია რამე მტკიცებულება, თუ როგორ მოხდა ამბოხებულთა დამარცხება.

საინფორმაციო სააგენტო ფარსთან მან განაცხადა, რომ აქციებზე მხოლოდ 15 000 ადამიანი გამოვიდა, ხოლო ყველა „სიმშვიდის დამრღვევი“ დაკავებულია.

ჯაფარის მტკიცებით, აქციებისკენ მოსახლეობას ჰილარი კლინტონმა უბიძგა.

„მტრებმა კარგად იციან, რომ არავითარ შემთხვევაში ვერ შეუქმნიან საფრთხეს ირანის ისლამურ რესპუბლიკას თავდაცვის კუთხით. შესაბამისად, მათ გამოიყენეს მთელი თავისი კაპიტალი, რათა კულტურული, ეკონომიკური და თავდაცვითი საფრთხეები შეუქმნან ისლამურ ირანს და ღვთის წყალობით, ისინი აუცილებლად იქნებიან დამარცხებულები“, -თქვა გენერალმა.

აქციები ერთი კვირის წინ დაიწყო, როცა მოსახლეობამ ფასების ზრდა გააპროტესტა. შემდგომ უკმაყოფილოთა ტალღამ მთელ ქვეყანას მოედო. დემონსტრანტები აპროტესტებდნენ ინფლაციას, ქვეყნის საგარეო კურსსა და სასულიერო პირების პოლიტიკას.

ლოს ანჯელეს თაიმსის თეირანის კორესპონდენტის ცნობით, მიტინგები სულ მცირე ირანის 10 ქალაქში მიმდინარეობდა.

პოლიციამ სულ მცირე 450 ადამიანი დააკავა, ვრცელდება ინფორმაცია 21 დაღუპულის შესახებ.

ეს იყო ყევლაზე მასშტაბური საპროტესტო აქცია ბოლო 8 წლის განმავლობაში. 2009 წელს მასობრივი დემონსტრაციები მოჰყვა საპრეზიდენტო არჩევნებს.

ანა მებურიშვილი