მსოფლიო

ანტისამთავრობო მასშტაბური საპროტესტო აქციის წინ ბელგრადში ათასობით დემონსტრანტი ჩავიდა

ანტისამთავრობო მასშტაბური საპროტესტო აქციის წინ ბელგრადში ათასობით დემონსტრანტი ჩავიდა, - ამის შესახებ ინფორმაციას სააგენტო Reuters-ი ავრცელებს.

ათასობით მომიტინგე, ძირითადად სტუდენტები, ბელგრადში შეიკრიბნენ მასშტაბური ანტისამთავრობო აქციების გამართვამდე. ბევრმა მათგანმა ასობით კილომეტრი ფეხით ან ველოსიპედით გაიარა, რათა დედაქალაქში ჩასულიყო.

სერბეთის პრეზიდენტმა ალექსანდარ ვუჩიჩმა განაცხადა, რომ სამართალდამცავებმა მოთმინება უნდა გამოეჩინონ, თუმცა უწესრიგობის შემქმნელები უნდა დააკავონ. „სახელმწიფო ყველაფერს გააკეთებს მშვიდობის უზრუნველსაყოფად. ვინც მას საფრთხეს შეუქმნის, დააკავებენ,“ - განაცხადა მან პრესკონფერენციაზე.

სტუდენტური კოლონების ბელგრადის ცენტრში შესვლისას ათასობით ადამიანი მხიარულებითა და სერბეთის დროშების აფრიალებით შეხვდა მათ. პარლამენტის შენობის მახლობლად შეკრებილმა ასობით მოტოციკლისტმა ძრავები გამაფრთხილებლად აამუშავა. ავტომობილები სიგნალებით გამოხატავდნენ მხარდაჭერას.

მხარდამჭერებმა, მათ შორის ბელგრადის სტუდენტებმა, მთავარ ქუჩაზე, ტერაზიეზე, წითელი ხალიჩა გაშალეს მომიტინგეების მისაღებად. „ბელგრადელებო, განმათავისუფლებლები ჩამოვიდნენ,“ - განაცხადა 19 წლის სტუდენტმა ანგელინამ, რომელიც ქალაქ ზრენიანინიდანაა.

სავარაუდოდ, ეს საპროტესტო გამოსვლები სერბეთის უახლესი ისტორიის ერთ-ერთი ყველაზე მასშტაბური იქნება. თითქმის ყოველდღიური სტუდენტური დემონსტრაციები დეკემბერში დაიწყო, მას შემდეგ, რაც 1 ნოემბერს ნოვი სადის რკინიგზის სადგურის სახურავის ჩამონგრევის შედეგად 15 ადამიანი დაიღუპა. ვუჩიჩის ოპონენტები ამ ტრაგედიას კორუფციას უკავშირებენ.

ვუჩიჩის განცხადებით, ხელისუფლება დედაქალაქში 60,000-დან 80,000-მდე დემონსტრანტის ჩასვლას ელოდება, თუმცა ორგანიზატორები გაცილებით მეტ ადამიანზე საუბრობენ. სტუდენტები, მასწავლებლები, ფერმერები და მუშები შეუერთდნენ საპროტესტო მოძრაობას, რაც სერიოზულ გამოწვევას წარმოადგენს ვუჩიჩისთვის, რომელიც უკვე 12 წელია, პრემიერ-მინისტრის ან პრეზიდენტის თანამდებობას იკავებს.

იმავდროულად, ვუჩიჩის მომხრეებიც ბელგრადში ჩამოვიდნენ და მისი ოფისის მახლობლად კარვები გაშალეს. მათ ქალაქში ტრაქტორები მიიყვანეს და კარვების ბანაკი მათით შემოსაზღვრეს.

მანამდე, მოქმედმა პრემიერ-მინისტრმა მილოშ ვუჩევიჩმა განაცხადა, რომ სამართალდამცავები ჩაერევიან, თუ ძალადობა მოხდება.

დეკემბერში სტუდენტებმა ხელისუფლებას რამდენიმე მოთხოვნა წაუყენეს, მათ შორის, რკინიგზის სადგურის ტრაგედიასთან დაკავშირებული დოკუმენტების გასაჯაროება და დამნაშავეების პასუხისგებაში მიცემა. პროკურატურამ უკვე 13 ადამიანი დაადანაშაულა, ხოლო მთავრობამ ანტიკორუფციული კამპანია დაიწყო. თანამდებობიდან გადადგნენ ვუჩევიჩი და ორი მინისტრი.