მსოფლიო

ანკარა ევროკავშირში შესვლის პოზიციას გადახედავს - რეჯეპ ტაიპ ერდოღანი

თურქეთის პრეზიდენტის რეჯეპ ტაიპ ერდოღანის განცხადებით, ანკარა ევროკავშირში შესვლის პოზიციას გადახედავს, რადგან ბრიუსელი შესაბამის მოლაპარაკებებს აჭიანურებს, ევროკავშირის რიგი წევრი-ქვეყნები კი, თურქეთის მიმართ მტრულად არიან განწყობილი.

ამის შესახებ ერდოღანმა Reuters-თვის მიცემულ ინტერვიუში განაცხადა.

„თუ ისინი გულწრფელები არ არიან, ჩვენ უკან დაბრუნების გზა უნდა ვიპოვოთ. რატომ უნდა ვიღწოდეთ გაწერვიანებისთვის მომავალშიც? მოლაპარაკებებს უკვე 54 წელიწადია ვმართავთ“,-განაცხადა თურქეთის ლიდერმა.

მისი თქმით, ევროკავშირში გაწევრიანების საკითხი შესაძლოა რეფერენდუმზე იქნას გატანილი.

მისივე თქმით, ევროკავშირი „გაქრობის“ პირას იმყოფება.

„ერთი, ან ორი სახელმწიფო ვერ შეძლებს ევროკავშირის სიცოცხლისუნარიანობის შენარჩუნებას.

იმისათვის, რომ კავშირი ძლიერი გავხადოთ, საჭიროა ისეთი ქვეყანა, როგორიც თურქეთია, ანუ ქვეყანა, რომელიც განსხვავებულ რელიგიას წარმოადგენს. მაგრამ, როგორც ჩანს ევროკავშირის წევრი-ქვეყნები ამას ვერ ათვითცნობიერებენ. მათთვის ძალიან რთულია მიიღონ ისეთი მუსლიმური სახელმწიფო, როგორიცაა თურქეთი“,-აღნიშნა ერდოღანმა.

გუშინ, ევროპის საბჭოს საპარლამენტო ასამბლეის დეპუტატებმა თურქეთში შექმნილი ვითარების მონიტორინგის განახლებას დაუჭირეს მხარი.

დეპუტატები ქვეყანაში ადამიანის უფლებების კუთხით შექმნილი ვითარებით არიან შეშფოთებული.

საქართველოს დელეგაციას თურქეთში მონიტორინგის განახლებისთვის მხარი არ დაუჭერია.

მონიკა დავლიანიძე