კომენტარი

ანა ნაცვლიშვილის განცხადებით, დღეს არსებული ნარკოპოლიტიკა ახალ პრობლემებს აჩენს

პრეზიდენტის საპარლამენტო მდივანის ანა ნაცვლიშვილის განცხადებით, დღეს არსებული ნარკოპოლიტიკა ახალ პრობლემებს აჩენს, არის რეპრესიული და ვერ პასუხობს ლეგიტიმურ მიზანს, რომ შეამციროს ნარკოდამოკიდებულება.

ანა ნაცვლიშვილის თქმით, მოლოდინი, რომ ეს ნარკოპოლიტიკა შეიცვლებოდა ჯერ კიდევ 2013 წლიდან არსებობს საზოგადოებაში და ეს მოლოდინი მაღალი იყო, თუმცა რეფორმა ჭიანურდება.

„ვხედავთ, რომ რეფორმა ჭიანურდება. პრეზიდენტმა უკვე შეცვალა შეწყალების კომისიისადმი მიმართვის პროცედურა და ის არის ბევრად მარტივი. იმ ადამიანებს, ვისაც აქვთ ბრალად შერაცხული ნარკომოხმარება და ნარკოდანაშაულები, გარდა ნარკოტრანზიტისა, გასაღებისა და დიდი ოდენობით ნარკოტიკული საშუალებებით ჩადენილი დანაშაულებისა, ადამიანებს აღარ მოუწევთ თვეობით და წლობით ლოდინი, რათა მიმართონ შეწყალების კომისიას. ეს არის მნიშვნელოვანი ცვლილება და გზას უხსნის ამ ადამიანებს, რომ მათი საქმეები კომისიამ ინდივიდუალურ რეჟიმში შეისწავლოს, დამატებითი ლოდინის გარეშე და მიიღოს გადაწყვეტილება”, – აცხადებს ანა ნაცვლიშვილი.

შეგახსენებთ, რომ დღეს მედიის წარმომადგენლებმა საქართველოს პრეზიდენტს პირველი არხის ყოფილი თანამშრომლის, მამუკა ბერძენიშვილის შეწყალების თხოვნით მიმართეს, ხოლო პარლამენტს რეპრესიული ნარკოპოლიტიკის შეცვლისა და შესაბამის კანონში ცვლილებების შეტანისკენ მოუწოდეს.

ცირა გურგენიძე