კომენტარი

ანა დოლიძე-ეროვნული ბანკის კანონპროექტზე: ჩვენ ვაზროვნებთ სახელმწიფოებრივად, ჩვენ არ გამოვეკიდებით

საქართველოს პრეზიდენტის საპარლამენტო მდივნის ანა დოლიძის განცხადებით, ეორვნული ბანკის შესახებ კანონში შესატანი ცვლილება ტექნიკური ხასიათის არის.

ამის შესახებ დოლიძემ პარლამენტის თავმჯდომარის მიერ გაკეთებული განცხადების კომენტირებისას აღნიშნა.

„გვქონდა კონსულტაციები ეროვნულ ბანკთანაც, საქართველოს პარლამენტთანაც. ეს არის ტექნიკური ხასიათის ცვლილება, რომელსაც, ბუნებრივია, იმიტომ რომ ჩვენ ვაზროვნებთ სახელმწიფოებრივად, ჩვენ არ გამოვეკიდებით. ამ ცვლილებების მნიშვნელობა ტექნიკურია. რახან ჩვენ ვუყურებთ ამ შენობაში მიმდინარე პროცესებს სახელმწიფოებრივი სახედიდან, ჩვენ არ ჩამოვებღაუჭებით იმ უფლებამოსილებას, რომელიც მხოლოდ და მხოლოდ ტექნიკურად მიგვაჩნია“,-აღნიშნა დოლიძემ.

პარლამენტის თავმჯდომარის განცხადებით, პარლამენტმა ეროვნული ბანკის შესახებ კანონში შესატანი ცვლილების პროექტი მოამზადა.

საკითხი ეხება პრეზიდენტის მიერ ეროვნული ბანკის ვიცე-პრეზიდენტების დასახელების უფლების შეზღუდვას.

ირაკლი კობახიძის თქმით, პარლამენტს შესაბამისი თხოვნით პრეზიდენტის ადმინისტრაციამ მიმართა, რადგან, მათი თქმით, „პრეზიდენტის შესაბამისი უფლებამოსილება არ მოდიოდა შესაბამისობაში კონსტიტუციასთან“.

მონიკა დავლიანიძე