მსოფლიო

ამერიკიდან 35 რუსი დიპლომატი გააძევეს

პრეზიდენტ ბარაქ ობამას გადაწყვეტილებით, ვაშინგტონიდან და სან-ფრანცისკოდან 35 რუსი დიპლომატი გააძევეს.

გარდა ამისა, გადაყწვეტილების ფარგლებში, მერილენდსა და ნიუ-იორკში ორი ე.წ დიპლომატიური აგარაკი იხურება, რომელიც რუსულ დიპმისიას ეკუთვნის. ამერიკის ხელისუფლების აზრით, აღნიშნული დასასვენებელი კომპლექსები,სადაზვერვო მიზნენს ემსახურება.

დიპლომატებს აგარაკების ტერიტორიაზე წვდომა 30 დეკემბერს, ადგილობრივი დროით 12:00 შეეზღუდებათ.

დიპლომატები ამერიკაში პერსონა ნონ-გრატად არიან გამოცხადებული და მათ შტატები 72 საათის განმავლობაში უნდა დატოვონ.

გარდა ამისა, ობამას გადაწყვეტილებით რუსეთის წინააღმდეგ ახალი სანქციები დაწესდა, რომელიც იმ კიბერშეტევებს უკავშირდება, რომელსაც რუსეთი ამერიკაში წინასაარჩევნო პერიოდის დროს ახორციელებდა.

„ყველა ამერიკელი უნდა იყოს შეშფოთებული რუსეთის ქმედებით. მსგავსი ქმედება გარკვეულ შედეგს იწვევს“,-ნათქვამია ამერიკის ჯერ კიდევ მოქმედი პრეზიდენტის, ბარაქ ობამას განცხადებაში.

ობამას განცხადებაში ხაზგასმულია, რომ ამერიკა შემდგომ ზომებსაც მიმართავს.

„ეს საბოლოო ზომა არ არის. ეს რუსეთის აგრესიულ ქმედებაზე ჩვენი საბოლოო პასუხი არ არის“,-ნათქვამია ობამას განცხადებაში.

რაც შეეხება შემოღებულ პერსონალურ სანქციებს, ის ექვს ადამიანს შეეხო და 5 უწყებას, რომელთა შორის რუსეთის უსაფრთხოების ფედერალური სამსახურიც (ФСБ) ფიგურირებს.

სანქციათა სიაში რუსეთის მთავარი სადაზვერვო სამმართველოს (ГРУ) ხელმძღვანელობა მოხვდა: უწყების ხელმძღვანელი იგორ კორობოვი, ასევე მისი პირველი მოადგილეები: ვლადიმირ ალექსეევი, სერგეი გიზუნოვი, და იგორ კოსიუტკოვი.

სანქციები შეეხო „სპეციალურ ტექნოლოგიურ ცენტრს“, რომელიც რუსეთის და საერთაშორისო აზომვითი დანადგარების ბაზარზეა ინტეგრირებული.

შეზღუდვები დაუწესდა,ავტონომიურ არაკომერციულ ორგანიზაციას „ინფორმატიკის სფეროს კონსტრუქტორების პროფესიულ გაერთიანებას“, რომელმაც შეიმუშავა და გამოუშვა სკანერების 10 ათასი ექზემპლარი,რომლებიც საარჩევნო უბნებზე ამომრჩეველთა ხმების ავტომატურ დათვლას უზრუნველყოფს.

ამავე სიაში მოხვდა, რუსეთის კიდევ ორი მოქალაქე, ალექსეი ბელანი და ევგენი ბოგაჩოვი, რომლებსაც ამერიკის გამოძიების ფედერალური ბიურო ჰაკერებს უწოდებს და რომლებიც დიდი ხნის განმავლობაშია რაც საერთაშორისო ძებნაში არიან გამოცხადებული.

მონიკა დავლიანიძე