მსოფლიო

ამერიკელი ხალხის სახელით მსურს მივულოცო რუს ხალხს რუსეთის დღე - მარკო რუბიო

ამერიკის შეერთებული შტატების სახელმწიფო მდივანმა მარკო რუბიომ რუს ხალხს მიულოცა სახელმწიფო დღესასწაული „რუსეთის დღე“, რომელსაც 12 ივნისს აღნიშნავენ.

სახელმწიფო დეპარტამენტის საიტზე გამოქვეყნებული განცხადების თანახმად, რუბიო რუს ხალხს ამერიკელი ხალხის სახელით ულოცავს და აღნიშნავს, რომ შეერთებული შტატები კვლავ მხარს უჭერს რუს ხალხს, რომელიც ნათელი მომავლის მშენებლობისკენ სწრაფვას განაგრძობს.

„ამერიკელი ხალხის სახელით მსურს მივულოცო რუს ხალხს რუსეთის დღე.

შეერთებული შტატები კვლავ მტკიცედ უჭერს მხარს რუს ხალხს, რომლებიც აგრძელებენ უკეთესი მომავლისკენ სწრაფვას. ამავდროულად, ვიყენებთ ამ შესაძლებლობას, კიდევ ერთხელ დავადასტუროთ ჩვენი სურვილი კონსტრუქციული თანამშრომლობისკენ რუსეთის ფედერაციასთან, რათა მიღწეულ იქნას მდგრადი მშვიდობა რუსეთისა და უკრაინის შორის. ვიმედოვნებთ, რომ მშვიდობა საფუძველს შექმნის ჩვენს ქვეყნებს შორის ურთიერთსასარგებლო ურთიერთობების გაღრმავებისთვის“, - წერია განცხადებაში.

• 1990 წლის 12 ივნისს, საბჭოთა კავშირის შემადგენლობაში მყოფი რუსეთის საბჭოთა სოციალისტური რესპუბლიკის სახალხო დეპუტატების ყრილობამ მიიღო რუსეთის ფედერაციის სახელმწიფოებრივი სუვერენიტეტის დეკლარაცია.
• 1994 წელს რუსეთში 12 ივნისი სახელმწიფო დღესასწაულად გამოცხადდა, 2002 წლიდან კი მას ოფიციალურად ეწოდება „რუსეთის დღე“.