კომენტარი

ამ ქვეყანაში ამისი მრავალწლიანი გამოცდილება არსებობს, რომ ტელევიზიის მფლობელებზე ხორციელდება ზეწოლა - ზურაბ ჯაფარიძე

„გირჩის“ ლიდერმა ზურაბ ჯაფარიძემ ტელეკომპანია „იბერიაში“ შექმნილ სიტუაციაზე საუბრისას განაცხადა, რომ საქართველოში არსებობს გამოცდილება, როცა ტელევიზიების მფლობელებზე, რომლებიც სხვა ბიზნესსაქმიანობითაც არიან დაკავებული, ზეწოლა ხორციელდება.

„ამ ქვეყანაში ამისი მრავალწლიანი გამოცდილება არსებობს, რომ ტელევიზიის მფლობელებს, რომლებსაც, როგორც წესი, აქვთ სხვა ბიზნესი, მათზე ხორციელდება ზეწოლა სწორედ იმის გამო, რომ ტელევიზიას შეექმნას რაღაც პრობლემა.

რომ ვთქვა, რომ ამ ქვეყანაში შეუძლებელია, ასეთი რაღაცები ხდებოდეს, ასეთი ადამიანი ამ ქვეყანაში არ არსებობს, ასეთი გამოცდილება თქვენს ტელევიზიასაც ჰქონდა წინა ხელისუფლების დროს“, -უთხრა ჯაფარიძემ „იბერია ტვ“-ს.

ცნობისთვის, დღეს ტელეკომპანიის ჟურნალისტებმა საგანგებო განცხადება გაავრცელეს, რომელშიც აღნიშნულია, რომ ხელისუფლებამ „იბერიას“ გადაუკეტა დაფინანსების მთავარი წყარო. კერძოდ, კომპანია ,,ომეგა ჯგუფი“, რომლის შემადგენლობაშიც შედის ტელეკომპანია ,,იბერია“, პარალიზებულია. ტელეკომპანიის განცხადებით, ხელისუფლებამ წარმოება მიზანმიმართულად გააჩერა.

„ჩვენ, ჟურნალისტებს გვაქვს ინფორმაცია, რომ ეს ხდება საგანგებოდ, რომ აღარ ისმოდეს ჩვენი ეთერიდან კრიტიკული აზრი. როგორც ჩანს, ხელისუფლების მიზანია, დაიხუროს ტელეკომპანია ,,იბერია“ და ვეღარ მოვახერხოთ ჩვენი პროფესიული საქმიანობის გაგრძელება. ჩვენ გვაქვს ინფორმაცია, რომ ,,ომეგა ჯგუფზე“ ხდება ზეწოლა, რათა ხელში ჩაიგდონ „ იბერია““, - წერია განცხადებაში.