კომენტარი

ამ ქვეყანას ივანიშვილი მართავს სუს-ზე დაყრდნობით - ირმა ნადირაშვილი

საპარლამენტო უმცირესობის წევრი, ირმა ნადირაშვილი აცხადებს, რომ ხელისუფლება ე.წ. მოსმენების გასაღების სუს-იდან გამოყოფაზე უარს იტყვის.

როგორც დეპუტატი ამბობს, ყოფილი პრემიერი, ბიძინა ივანიშვილი ფარულ მოსმენებს პოლიტიკური მიზნებისთვის იყენებს.

„ჩვენ, თავის დროზე, როდესაც ეს კანონპროექტი განიხილებოდა პარლამენტში გვქონდა ძალიან პრინციპული პოზიცია, რომ სუს-ში ეს გასაღები არ უნდა იყოს. 31 მარტამდე უნდა გასწორდეს ეს საკანონმდებლო ხარვეზი. ვთვლი, რომ პარლამენტში ამ თემაზე დებატები ისევ გაიხსნება, მაგრამ ძნელად წარმომიდგენია, რომ ივანიშვილი შეელევა „მოსმენების გასაღებს“, რადგან დღემდე ამ ქვეყნის მართვა ხდება პირად თვალთვალზე, მოსმენებზე დაყრდნობით და ამ ქვეყანას ივანიშვილი მართავს სუს-ზე დაყრდნობით. ჩვენი, ოპოზიციის ვალია, რომ ამ კუთხით გადაიდგას ნაბიჯები, რაც სამუდამოდ დაამთავრებს სუს-ის მხრიდან ამ ქვეყნის მართვას“, - განაცხადა ირმა ნადირაშვილმა.

ცნობისათვის: ხვალ, პარლამენტში ე.წ. მოსმენების კანონში ცვლილებებთან დაკავშირებით პირველად გაიმართება სამუშაო ჯგუფის შეხვედრა. არასამთავრობო ორგანიზაციები მოითხოვენ, რომ ე.წ. გასაღები სახელმწიფო უსაფრთხოების ნაცვლად სხვა დამოუკიდებელ ორგანოს გადაეცეს.

ნინო ექვთიმიშვილი