კომენტარი

ალეკო ელისაშვილმა პოპულისტური გადაწყვეტილება მიიღო - მამუკა ახვლედიანი

თბილისის საკრებულოს ფრაქცია „მოძრაობა თავისუფლებისთვის-თბილისის“ თავმჯდომარის, მამუკა ახვლედიანის შეფასებით, საკრებულოს დამოუკიდებელი დეპუტატის ალექსანდრე ელისაშვილის მიერ მიღებული გადაწყვეტილება - პოპულისტური ნაბიჯია.

მისი თქმით, ამჟამად საკრებულოს წინაშე დგას მნიშვნელოვანი საკითხები და მისი გადაწყვეტილება არის გაქცევა ბრძოლის ველიდან.

„მაშინ როდესაც დღეს და ამ პერიოდში, არის ყველაზე მნიშვნელოვანი თემები, ამ დროს დატოვება და გაქცევა ბრძოლის ველიდან, მიმაჩნია, რომ არასწორი ნაბიჯია და ამ ნაბიჯს მხოლოდ და მხოლოდ პოპულისტურს ვუწოდებ“,-განაცხადა ახვლედიანმა.

რაც შეეხება ელისაშვილის მიერ გაკეთებულ განცხადებას, რომ ის პირველი ადგილისთვის იბრძვის და დანარჩენი ოპოზიცია მეორე ადგილისთვის, ახვლედიანმა აღნიშნა, რომ მსგავსი განცხადებები წინასაარჩევნო თამაშებია.

„მეორე ადგილი, პირველი ადგილი, მესამე ადგილი, ამაზე საუბარი არის მხოლოდ და მხოლოდ წინასაარჩევნო თამაში. ამ თამაშში მონაწილეობას ჩვენ არ ვაპირებთ. პირადად ჩვენ ვიბრძვით გამარჯვებისათვის და იმ უკანონობისათვის, რომლის დამკვიდრება უნდა უმრავლესობას თბილისის საკრებულოში“,-აღნიშნა ახვლედიანმა.

ალექსანდრე ელისაშვილმა, ადგილობრივ თვითმმართველობამდე სამი კვირით ადრე საკრებულოს დატოვების გადაწყვეტილება მიიღო.

მონიკა დავლიანიძე