კომენტარი

ახალგაზრდების ჯანსაღი ცხოვრების წესი იქნება ერთ-ერთი პრიორიტეტი - მიხეილ ჩხენკელი

განათლების მინისტრობის კანდიდატის, მიხეილ ჩხენკელის განცხადებით, ახალგაზრდების ჯანსაღი ცხოვრების წესი არის ძალიან მნიშვნელოვანი და იქნება მისი სამინისტროს ერთ-ერთი პრიორიტეტი.

ამის შესახებ ჩხენკელმა მედიას, მთავრობის ადმინსიტრაციაში გიორგი კვირიკაშვილთან გამართული შეხვედრის შემდეგ განუცხადა.

„უღრმესი მადლობა მინდა გადავუხადო პრემიერ-მინისტრს, რომელმაც ნდობა გამომიცხადა და მინდა გითხრათ, რომ მთელ ჩემს ცოდნას, გამოცდილებას, ენერგიას მოვახმარ ამ ძალიან მნიშვნელოვან საქმეს, რასაც ჰქვია განათლებისა და მეცნიერების ხარისხის განვითარება საქართველოში.

გვქონდა ძალიან საინტერესო შეხვედრა პრემიერ-მინისტრთან და კონკრეტულად ვისაუბრეთ საკითხზე, რომ მთავრობის 4-პუნქტიან გეგმაში განათლებასა და განათლებაზე ზრუნვას აქვს უაღრესად მნიშვნელოვანი პოზიცია. მთავარი, რაზეც ჩვენ ვისაუბრეთ პრემიერ-მინისტრთან არის ის, რომ თითოეულმა ახალგაზრდამ უნდა იგრძნოს, რომ სახელმწიფო მათზე ზრუნავს. გვყავს ძალიან ნიჭიერი ახალგაზრდები, კარგი თაობა მოდის და მათ სჭირდებათ ხელშეწყობა. ყველა იმ პირობის შექმნა, რომ პოტენციალი, რომელიც მათ გააჩნიათ, მოხდეს ამ პოტენციალის რეალიზაცია. ჯანსაღი ცხოვრების წესი არის ის თემატიკა, რომელსაც სჭირდება სერიოზული, კომპლექსური და ფუნდამენტური მიდგომა.

ზოგადად, ახალგაზრდების ჯანსაღი ცხოვრების წესი არის ძალიან მნიშვნელოვანი და იქნება ჩვენი სამინისტროს ერთ-ერთი პრიორიტეტი“,-აღნიშნა მინისტრობის კანდიდატმა.

მონიკა დავლიანიძე