კომენტარი

აჰმეტ ჩატაევთან დაკავშირებით ოპოზიციის უსინდისო და ზღვარგადასულ ბრალდებებს არ მივიღებთ - ეკა ბესელია

პარლამენტის იურიდიულ საკითხთა კომიტეტის თავმჯდომარე ეკა ბესელია აჰმეტ ჩატაევთან დაკავშირებით ოპოზიციის ბრალდებას პასუხობს.

ოპოზიცია მედიაში გავრცელებულ ინფორმაციას ეხმიანება, იმის შესახებ რომ 22 ნოემბერს ბერ გაბრიელ სალოსის ქუჩაზე ჩატარებული ანტიტერორისტული ოპერაციის შედეგად, ჩეჩენი მებრძოლი, აჰმეტ ჩატაევი იქნა ლიკვიდირებული.

ოპოზიცია ხელისუფლებას ბრალს სდებს იმაში, რომ მან ჩატაევი საქართველოს საპატიმროდან 2012 წელს გაათავისუფლა, ასევე კითხვას სვამს თუ როგორ მოახერხა „ისლამური სახელწმიფოს“ რიგებში წასულმა ჩატაევმა საქართველოში დაბრუნება.

ეკა ბესელიას თქმით, მმართველი გუნდი ამგვარ „უსინდისო და ზღვარგადასულ ბრალდებებს ვერ მიიღებს“.

„ასეთ უსინდისო განცხადებებს, ასეთ ზღვარგადასულ ბრალდებებს არ მივიღებთ არავისგან და განსაკუთრებით იმ ადამიანებისგან, რომლებიც თვითონ აწყობდნენ ტერაქტებს საკუთარ ქვეყანაში. უამრავი ფაქტი შემიძლია გავიხსენო მათ მიერ დაგეგმილი ხელოვნური ტერაქტების, რომელსაც ეწირებოდა ჩვენი ქვეყნის მოქალაქეები. ამიტომ, ამ თემაზე ნურავინ ნუ გაბედავს, რომ თავს უფლება მისცეს და ილაპარაკოს თითის გაშვერით ჩვენსკენ, მაშინ როდესაც ყველაფერს ვაკეთებთ იმისთვის, რომ მათ მიერ დატოვებული უმძიმესი მემკვიდრეობა საქართველოს მოქალაქეებმა საკუთარ თავზე არ იგემონ“,-აღნიშნა ბესელიამ.

კითხვაზე, თავის დროზე უნდა თუ არა გათავისუფლებულიყო ჩატაევი საპატიმროდან, იურდიულ საკითხთა კომიტეტის თავმჯდომარე იმ ბრალს იხსენებს, რომელიც ჩატაევს ქონდა წაყენებული.

„კითხვა დაიწყეთ იქიდან, თუ რა ბრალდება წაუყენა მას წინა ხელისუფლებამ და ის ბრალდება უნდა თუ არა ყოფილიყო დადასტურებული. ბრალდება იყო- საბრძოლო მასალის შენახვა, რაც ნაკლებად მძიმე დანაშაულია, როგორც მე ვიცი. ამოიღეთ ის მასალები, ნახეთ თუ რა საქმე გააგზავნეს სასამართლოში. და დღეს რომ ბევრს ლაპარაკობენ, რომ თითქოს ის გათავისუფლდა პარლამენტის მიერ არის აბსოლუტური სიცრუე და ტყუილი“,-აღნიშნა ბესელიამ.

მონიკა დავლიანიძე