კომენტარი

„აღმოსავლეთ პარტნიორობის“ კომუნიკეში აღაირებულია საქართველოს ევროპული მისწრაფებები - იანოშ ჰერმანი

საქართველოში ევროკავშირის ელჩის იანოშ ჰერმანის განცხადებით, „აღმოსავლეთ პარტნიორობის“ სამიტის დეკლარაციაში საქართველოს ევროპული მისწრაფებები არის აღიარებული, ასევე პროგრესი ასოცირების ხელშეკრულების განხორციელების კუთხით.

ამის შესახებ საქართველოში ჰერმანმა, ფონდ „ღია საზოგადოება - საქართველოს“ მიერ ორგანიზებული კონფერენციის დასრულების შემდეგ განაცხადა, რომელზეც 2017 წლის „აღმოსავლეთ პარტნიორობის“ სამიტის შედეგების შეჯამება მოხდა.

„პირველი შემთხვევა იყო, როდესაც მთავრობის და სამოქალაქო საზოგადოების წარმომადგენლებთან „აღმოსავლეთ პარტნიორობის“ სამიტი განვიხილეთ. ჩვენ პირველი შეფასება მივეცით ამ ღონისძიებას. ვისაუბრეთ იმის თაობაზე, თუ როგორ შევაფასოთ სამიტი პოლიტიკურად. რა თქმა უნდა, ჩვენ ასევე ვისაუბრეთ იმაზე, თუ რას ნიშნავს საქართველოსთვის სამიტის შედეგები, განსაკუთრებით პრაქტიკულ ჭრილში. ვისაუბრეთ იმ ახალ რესურსებზე, რომელსაც ევროკავშირი საქართველოს გამოუყოფს ბიზნესის, მცირე და საშუალო საწარმოების განვითარებისთვის, ინფრასტრუქტურის მშენებლობისთვის. ჩვენ აქტიურად უნდა ვიმუშავოთ, რათა მაქსიმალურად გამოვიყენოთ ეს რესურსები.

თუ ამ კომუნიკეს წავიკითხავთ, დავინახავთ, რომ მას ხელს 34 ქვეყანა აწერს. შესაბამისად, მას ეთანხმება ევროკავშირის 28 წევრი და 6 პარტნიორი ქვეყანა. ეს არის კონსენსუსი 34 პარტნიორს შორის. ის მხოლოდ ევროკავშირის პოზიციას არ გამოხატავს.

ამ დოკუმენტში აღიარებულია ზოგიერთი ქვეყნის ევროპული მისწრაფებები, მათ შორის საქართველოს მისწრაფება. ასევე ხაზგასმულია ასოცირების შეთანხმების კუთხით მიღწეული პროგრესი. ასევე, ეს დოკუმენტი იყურება წინ, თუ როგორ უნდა მოხდეს ასოცირების შეთანხმების განვითარება. პოლიტიკურად ეს ყველაზე მნიშვნელოვანი ნაწილია“,-განმარტა იანოშ ჰერმანმა.

მონიკა დავლიანიძე