კომენტარი

ადვოკატები აფიქსირებენ იმ მუხლებს და ნორმებს, რომლებიც ჩვენების მიცემისგან თავის არიდებას არ ითვალისწინებს- დავით გუმბერიძე

პროკურორ დავით გუმბერიძის განცხადებით, ე.წ ციანიდის საქმის ადვოკატებს ჩვენების მიცემა არ სურთ და აფიქსირებენ იმ მუხლებს და ნორმებს, რომლებიც ჩვენების მიცემისგან თავის არიდებას არ ითვალისწინებს.

ამის შესახებ გუმბერიძემ საქალაქო სასამართლოში განაცხადა, სადაც საქმის სამ ადვოკატს მაგისტრი მოსამართლის თანდასწრებით დაკითხავენ.

„პრობლემა ადვოკატებთან დაკავშირებით შეიქმნა, რომლებსაც გარკვეული მიზეზების გამო არ სურთ ჩვენების მიცემა და აფიქსირებენ იმ მუხლებს და ნორმებს, რომელიც არ ითვალისწინებს, მოცემულ შემთხვევაში, ჩვენების მიცემისგან თავის არიდებას. გამომდინარე იქიდან, რომ ის კითხვები, რაც გამოძიებას გააჩნია არ უკავშირდება მათ პროფესიულ საქმიანობას, იმ ინფორმაციას, რაც მათ უშუალოდ ბრალდებულთან ურთიერთობის დროს მიიღეს.

აქ მთავარი ამოსავალი წერტილი გახლავთ კვალიფიკაცია, რაზეც ჩვენ გამოძიებას ვაწარმოებთ. ეს არის მტკიცებულებების გასაჯაროება, ასევე სასამართლოს დახურული სხდომიდან ინფორმაციის გამოტანა. ჩვენ კითხვები გაგვაჩნია ამ პირებთან, როგორც ადვოკატებთან, რომ უზრუნველყვეს თუ არა საიდუმლოებების შენახვა?“,- განმარტა პროკურორმა.

კითხვაზე, შეიძლება თუ არა, ადვოკატების წინააღმდეგ სამართლებრივი დევნა დაიწყოს, დავით გუმბერიძე პასუხობს, რომ “ ჩვენ ვაწარმებთ სრულყოფილ გამოძიებას და მივიღებთ იმ სამართლებრივ გადაწყვეტილებას, რაც ამ საქმის გამოძიებას უკავშირდება“.

მონიკა დავლიანიძე