მსოფლიო

4 თებერვალს მასობრივ საპროტესტო აქციებს ვიწყებთ ქვეყნის მთავარი ქურდისა და ბარიგის - პეტრო პოროშენკოს გადასაყენებლად - მიხეილ სააკაშვილი

შინაპატიმრობაში მყოფმა საქართველოს ყოფილმა პრეზიდენტმა და ოდესის ექს-გუბერნატორმა მიხეილ სააკაშვილმა განაცხადა, რომ უკრაინის პრეზიდენტის, პეტრო პოროშენკოს იმპიჩმენტის მოთხოვნით მარში 4 თებერვალს განახლდება.

პროტესტების ჩასატარებლად ოდესის ექს-გუბერნატორმა მხარდამჭერებს ფინანსური დამხარება სთხოვა.

„ჩვენ მასობრივ საპროტესტო აქციებს ვიწყებთ ქვეყნის მთავარი ქურდისა და ბარიგის - პეტრო პოროშენკოს მშვიდობიანი, კონსტიტუციური გზით გადასაყენებლად.

უკვე მომავალ კვირას, 4 თებერვალს, შევჩენკოს პარკიდან მაიდანამდე მარში გაიმართება.

მეხუთე თვეა, ვებრძვით ოლიგარქიას, კორუფციასა და დიქტატურას. გვქონდა ძალიან მარტივი მოთხოვნები - იმპიჩმენტის შესახებ კანონის მიღება, ანტიკორუფციული სასამართლოს შექმნა, არჩევნების შესახებ ახალი კანონის მიღება და დეპუტატის ხელშეუხებლობის გაუქმება. ამის სანაცვლოდ ჩვენ მივიღეთ პოლიტიკური ტერორი და რეპრესიები, დაპატიმრებები, დევნა და გაყალბებული სისხლის სამართლის საქმეები.

ამ ბანდასთან კომპრომისი არ შეიძლება. ჩვენ გამარჯვებამდე მივალთ!

ჩვენი რესურსები ოლიგარქის რესურსებს ვერ შეედრება. საშუალო კლასი გამარჯვებას მხოლოდ მაშინ ახერხებს, როდესაც ერთიანდება და თავის რესურსებს კონკრეტული ამოცანის მისაღწევად მიმართავს.
ჩვენ თქვენი დახმარება გვჭირდება!

მარშის ორგანიზებისთვის, ბუკლეტების მომზადება და გავრცელება გვჭირდება, ასევე რეგიონებიდან კიევში ხალხის ტრანსპორტირება და სცენის აუდიოსისტემით უზრუნველყოფა“, - დაწერა მიხეილ სააკაშვილმა და პარტიის საბანკო რექვიზიტები გამოაქვეყნა.

26 იანვარს კიევის სააპელაციო სასამართლომ სააკაშვილს შეუფარდა შინაპატიმრობა საღამოს 10 საათიდან დილის 7 საათამდე, რომელიც იმოქმედებს 5 თებერვლამდე.

ბოლო ე.წ. „იმპიჩმენტისთვის მარში“ კიევში 2017 წლის 17 დეკემბერს გაიმართა.