მსოფლიო

2014 წელს დონეცკის ოლქში მალაიზიური ბოინგ-777-ის ჩამოვარდნის მიზეზი რუსული „БУК“-ის რაკეტა იყო - გამოძიების შედეგები

დონეცკის ოლქში მალაიზიური ბოინგი-777 რუსეთის შეიარაღებული ძალების კურსკის 53-ე ბრიგადის მიერ კუთვნილი „БУК“-ის დანადგარის რაკეტით ჩამოაგდეს. ასეთ დასკვნამდე მივიდა საგამოძიებო კომისია, რომელიც ჰოლანდიის ხელმძღვანელობით 5 ქვეყანას აერთიანებს.

2015 წლის ოქტომბერში ჰოლანდიის უსაფრთხოების საბჭომ დაასკვნა, რომ თვითმფრინავი რუსული წარმოშობის რაკეთით ჩამოაგდეს. რუსეთი ბრალდებებს უარყოფდა და ამტკიცებდა, რომ რუსული წარმოშობის იარაღი არ იყო გამოყენებული.

მალაიზიური ავიახაზების კუთვნილი ბოინგი 2014 წლის 17 ივლისს უკრაინის აღმოსავლეთში, პრორუსი სეპარატიოსტების მიერ დაკავებულ დონეცკის ოლქში ჩამოაგდეს. ავიაკატასტროფის შედეგად ლაინერში მყოფი 298-ვე ადამიანი დაიღუპა. ბოინგი ამსტერდამიდან კუალა ლუმპურში მიფრინავდა.