მსოფლიო

2008 წლის რუსეთის აგრესიაზე დასავლეთის რეაქცია არასაკმარისად მკაცრი იყო - ესტონეთის პრეზიდენტი

„რუსეთი არაპროგნოზირებადია. რუსეთი არ ცნობს მის მიერ ხელმოწერილ საერთაშორისო შეთანხმებებს“, - ასე აღწერა რუსეთის საგარეო პოლიტიკა ესტონეთის პრეზიდენტმა კერსტი კალიულაიდმა ბიბისისთან ინტერვიუში.

საუბარი ასევე შეეხო რუსეთის აგრესიას საქართველოსა და უკრაინის მიმართ. ესტონეთის პრეზიდენტის შეფასებით, 2008 წელს დასავლეთს მკაცრი ზომები არ მიუღია მოსკოვის წინააღმდეგ.

„როცა ეს მოვლენები [2008 წლის ომი] მოხდა საქართველოში, დასავლეთის რეაქცია არასაკმარისად მკაცრი იყო. დასავლურმა ქვეყნებმა არ გააგებინეს, რომ მსგავსი მოვლენების განვითარებას არ მოითმენენ.

ახლა დასავლურმა ხელმძღვანელებმა ისწავლეს გაკვეთილი. ამიტომ როცა ყირიმის მოვლენები მოხდა, ამას მოჰყვა მკაცრი საპასუხო რეაქცია. დააკისრეს სანქციები, მოხდა იმის გააზრება, რომ მინსკის შეთანხმებები ცხოვრებაში უნდა განხორციელდეს და ის, რომ ყირიმი უნდა დაუბრუნდეს უკრაინას. ეს ყველაფერი ძალაშია“,-განაცხადა კალიულაიდმა.