მსოფლიო

10 დაღუპული და 10 დაშავებული - ტეხასის ერთ-ერთ სკოლაში მოსწავლემ სროლა ატეხა

ტეხასში, სანტა ფეს საშუალო სკოლაში ატეხილი სროლის შედეგად 10 ადამიანი დაიღუპა, ხოლო კიდევ 10 დაშავდა. დაღუპულთა შორის უმრავლესობა სკოლის მოსწავლეა.

თავდამსხმელი დაკავებული და იდენტიფიცირებულია. ის 17 წლის დიმიტრიოს პაგურტცისი ყოფილა, რომელიც სანტა ფეს სკოლის მოსწავლეა.

მან უკანონოდ გამოიყენა იარაღი, რომელიც მამამისს მოპარა.

ტეხასის გუბერნატორის, გრეგ ებოტის თქმით, სკოლაში „სხვადასხვა სახის ასაფეთქებელი მოწყობილობა აღმოაჩინეს“. ებოტის თქმით, პოლიციამ მიაგნო ინფორმაციას თავდასხმლის დღიურში, კომპიუტერსა და მობილურში, რაც აჩენს ვარაუდს, რომ ის გეგმავდა თავდასხმას და ჩადენილის შემდეგ თავის მოკვლასაც აპირებდა.

სანტა ფეს პოლიციის უფროსმა ჯეფ პოუელმა მოუწოდა ადგილობრივებს, ფრთხილად იყვნენ, თუკი რამე სახის საეჭვო ნივთს წააწყდებიან.

წელს ეს მეორე მასშტაბური სისხლიანი თავდასხმაა ამერიკულ სკოლაში. თებერვალში ფლორიდის შტატში, პარკლენდის „მარჯორი სტოუნმენ დუგლასის“ სკოლაში თავდასხმის შედეგად 17 ადამიანი დაიღუპა.

სამონიტორინგო ჯგუფის „იარაღით ჩადენილი ძალადობის არქივის“ (the Gun Violence Archive) ინფორმაციით, წელს აშშ-ში 5000-ზე მეტი ადამაინი დაიღუპა ცეცხლსასროლი იარაღით ატეხილი სროლის შედეგად.