რეგიონები

ზუგდიდში თხილის ქარხანა დააყაჩაღეს

თხილის ექსპორტიორი „აგროსახლის“ დამფუძნებელი, მაია მიქავა უსაფრთხოების დაცვას ითხოვს.

მისი ინფორმაციით, სამმა ნიღბიანმა ზუგდიდში, თხილის ქარხანა, "თურალ გრუპი " დააყაჩაღა.

მაია მიქავას განცხადებით, ისინი ქარხნის ტერიტორიაზე იარაღის მუქარით შეიჭრნენ და 50 ათასი ლარი წაიღეს.

მაია მიქავა შემთხვევის დღეს იხსენებს და ეჭვობს, რომ დაყაჩაღების მიზნით მისული პირები კომპანიის ტერიტორიას საკმაოდ კარგად იცნობდნენ.

„ესენი შემოვიდნენ უკანა ტერიტორიიდან, საიდანაც ფიზიკურად ადამიანი, თუ კარგად არ იცნობ ტერიტორიას, ვერ მოაღწევ აქამდე. ზუსტად იცოდა, საიდან უნდა შემოსულიყო. ღობიდან გადმოძვრა, 3-მეტრიანი კედლიდან, მომზადებული წამოვიდნენ, წამოიღეს კიბე, მოადგეს, გადმოვიდნენ. მომზადებულები იყვნენ „სკოჩებით“. სავარაუდოდ, ფიქრობდნენ, რამდენი ადამიანი იქნებოდა 20:00 საათისთვის. ზუსტად იცოდნენ, რომ ფული ადგილზე იყო. ისიც იყო ნიშანდობლივი, რომ ესენი ფეხით იყვნენ მოსულები და იცით, როგორი ავტომატებით არიან მოსულები, რომლებიც უიშვიათესია და ამას ჯიბეში ვერ დამალავდნენ,“ - განაცხადა მაია მიქავამ.

თავდასხმის დროს დაშავდა ერთი თანამშრომელი, რომელსაც თავდამსხმელმა თავში იარაღი ჩაარტყა. ადგილზე საგამოძიებო მოქმედებები მთელი ღამის განმავლობაში მიმდინარეობდა. გამოძიება სისხლის სამართლის კოდექსის 179-ე ყაჩაღობის მუხლით დაიწყო. დაკავებული ჯერჯერობით არავინ არ არის.