რეგიონები

ზუგდიდში სასაფლაოზე სავარაუდოდ, მოკლული მამაკაცის ცხედარი იპოვეს

ზუგდიდში, ე.წ. „ქაფათის“ სასაფლაოზე სავარაუდოდ 30 წლამდე მოკლული მამაკაცის ცხედარი იპოვეს.

ამჟამად, ცხედარს იდენტიფიცირების მიზნით ექსპერტიზა უტარდება.

უცნობი მამაკაცი, რომელიც დაახლოებით 50 სანტიმეტრის სიღრმეზე იყო ჩამარხული, მესაფლავეებმა შემთხვევით ახალი საფლავის გაჭრისას აღმოაჩინეს.

„სასაფლაოების მართვის ცენტრის“ თანამშრომლის ანზორ კალანდიას ინფორმაციით, ცხედარი პოლიეთილენის პარკში იყო გახვეული.

„ჯინსის შარვალი, შავი სპორტული ზედა და ბათინკი ეცვა. ჩემი ვარაუდით, ის ასე 30 წლის წინ არის მოკლული და ვიღაცამ პარკში გაახვია და სასწრაფოდ დამარხა, რადგან სხვა შემთხვევაში არ შეიძლებოდა მიცვალებული 50 სანტიმეტრზე დაემარხათ. არ არის გამორიცხული, ეს ადამინი 90-იანი წლების კონფლიქტის დროს იყოს დაღუპული და იმედი მაქვს, რომ ექსპერტიზის შედეგად მისი იდენტიფიცირება მოხერხდება და პატრონი გამოუჩნდება", - განაცხადა კალანდიამ.

მომხდართან დაკავშირებით შინაგან საქმეთა სამინისტრომ გამოძიება დაიწყო.

ნინო ექვთიმიშვილი