რეგიონები

ზუგდიდში 2012 წელს აშენებული ყინულის მოედნის რეაბილიტაციისთვის 5 მილიონ ლარზე მეტი დაიხარჯა - 6 წლის განმავლოაში მოედანი 2-ჯერ დაზიანდა

არასამთავრობო ორგანიზაცია „ფლანგვის დეტექტორის“ ინფორმაციით, ზუგდიდში 2012 წელს აშენებული ყინულის მოედნის რეაბილიტაციისთვის 5 მილიონ ლარზე მეტი დაიხარჯა.

„ფლანგვის დეტექტორი“ წერს, რომ 6 წლის განმავლობაში მოედანი ორჯერ დაზიანდა. პირველად ეს მოხდა 2015 წელს და მას რეაბილიტაცია უკრაინელმა სპეციალისტებმა ჩაუტარეს, რისთვისაც ადგილობრივი ბიუჯეტიდან 154 127 ლარი გამოიყო. 2018 წელს კი კვლავ გამოცხადდა ტენდერი ყინულის სახლის რეაბილიტაციაზე, რისთვისაც ბიუჯეტიდან 407,830 ლარია გამოყოფილი, რაც ფლანგვის დეტექტორის“ მკვლევრის, დავით მჟავანაძის თქმით, აღემატება სოციალურად დაუცველთა, შშმ პირთა, ვეტერანთა და დევნილთა დასახმარებლად გამოყოფილი თანხა.

„ეს ყინულის სახლი უკვე სამ წელიწადში გახდა სარეაბილიტაციო. 2015 წელს 154 000 ლარი დაიხარჯა რეაბილიტაციაზე. 2018 წელს ისევ არის ადგილობრივი ბიუჯეტიდან გამოყოფილი 408 ათასი ლარი ყინულის მოედნის რეაბილიტაციისთვის. ეს თანხა უფრო მეტია, ვიდრე 2018 წლის ზუგდიდის ბიუჯეტში გაწერილი თანხები სოციალურად დაუცველთა, შშმ პირთა, ვეტერანთა და დევნილთა დასახმარებლად“, - განაცხადა მჟავანაძემ.

როგორც „ფლანგვის დეტექტორის“ კვლევაშია მითითებული, 2018 წლის მონაცემებით, ზუგდიდის სპორტულ დაწესებულებათა მართვის ცენტრისათვის 1,160,000 ლარია გამოყოფილი, რომლის 96% (1,117,000 ლარი) 130 თანამშრომლის ხელფასებზე უნდა წავიდეს. ორგანიზაციის ცნობით, აღნიშნული ა.ა.ი.პ-ს აქვს ჰოკეის განყოფილება, რომელიც მიბმულია გასარემონტებელ ყინულის მოედანს. კვლევაში მოყვანილია სპორტულ დაწესებულებათა მართვის ცენტრის ხელმძღვანელის, დავით კვაშილავას განცხადება, რომ ჰოკეის განყოფილება წლებია, რაც ზუგდიდში არსებობს: „ის მიბმულია ყინულის მოედანს, თუმცა იქ არავინ არ არის დასაქმებული. ბიუჯეტიდან კი ფინანსდება ა.ა.ი.პ, რომელშიც მხოლოდ ფორმალურად არის ჰოკეის განყოფილება“.