რეგიონები

ზუგდიდის მუნიციპალიტეტში საჯარო მოხელეები ხანდაზმულთა მოვლის პროგრამაში ჩაერთვნენ

ზუგდიდის მუნიციპალიტეტის გამგეობამ, ახალი, უნიკალური პროექტის „ხანდაზმულებზე მზრუნველი მობილური ჯგუფი“-ს განხორციელბა დაიწყო - ამის შესახებ ინფორმაციას ზუგდიდის მუნიციპალიტეტის გამგეობა ავრცელებს.

გამგეობის ინფორმაციით, პროექტში ჩართული მოხალისეები, ხეცერას ადმინისტრაციულ ერთეულში, მარტოხელა ხანდაზმულ ვარდიშა პაჭკორიას ესტუმრნენ, საცხოვრებელი კარ-მიდამო მოუწესრიგეს და საკვებით უზრუნველყვეს.

ვარდიშა პაჭკორიას კარ-მიდამოს მოწესრიგებაში მუნიციპალიტეტის გამგებელი ლაშა გოგია, მუნიციპალიტეტის საკრებულოს თავმჯდომარე მაიზერ ნანავა, მოადგილე თამაზ ჟორჟოლიანი და ადგილობრივი თვითმმართველობის წარმომადგენლები ჩაერთვნენ.

“ხანდაზმულებზე მზრუნველი მობილური ჯგუფი“ ზუგდიდის მუნიციპალუტეტის გამგეობისა და PIN-ის ერთობლივი პროექტია, რომელიც 1 დეკემბრამდე 30 ბენეფიციარს მოემსახურება. დღეს პირველი დღეა და მასში საჯარო მოხელეები ჩაერთნენ. პროექტი მიზნად ისახავს მარტოხელა ხანდაზმულების მხარდაჭერას. მათ მოემსახურებათ ექიმი, სტილისტი და ტექნიკური ჯგუფი, რომლებიც სხვადასხვა სახის მომსახურეობას, როგორც ეზოში ასევე სახლში გაუწევენ. მუნიციპალიტეტის გამგეობა მსაგავსი პროექტების განხორციელებას მომავალშიც გააგრძელებს“, - აღნიშნა ლაშა გოგიამ.

პროექტს მუნიციპალიტეტის გამგეობა არაკომერციულ ორგანიზაცია PIN-ის მხარდაჭერით ახორციელებს. სამიზნე ჯგუფს ზუგდიდის მუნიციპალიტეტის ტერიტორიაზე მცხოვრები მარტოხელა ხანდაზმულები წარმოადგენენ, რომელთაც არა აქვთ ფიზიკური და ეკონომიკური საშუალება მოიწესრიგონ საცხოვრებელი გარემო-პირობები და ჰიგიენა. პროექტისთვის შეირჩა 30 ბენეფიციარი, რომლებიც ყველაზე მეტად საჭიროებენ ამ პროექტში ჩართვას.

პროექტისთვის შეძენილ იქნა სპეციალური მიკროავტობუსი, რომელიც აღჭურვილია სარეცხი მანქანით, წყლის ავზითა და ყველა საჭირო ინსტრუმენტით.

სერვისის დასანერგად ჩამოყალიბდა სამედიცინო მუშაკით, დამლაგებლით, მძღოლითა და ახალგაზრდა მოხალისეებით დაკომპლექტებული მობილური ჯგუფი, რომლებიც წინასწარ შერჩეულ მარტოხელა ბენეფიციარებს ადგილზე მისვლით მოუწესრიგებენ საცხოვრებელ გარემოს, კარ-მიდამოს, იზრუნებენ მათ ჯანმრთელობასა და ჰიგიენური ნორმების დაცვაზე.

პროექტის ხანგრძლივობა 7 თვეა და ის დაფინანსებულია ევროკავშირის მიერ, ორგანიზაცია „ადამიანი გაჭირვებაში“ (People In Need) პროექტის ფარგლებში და ზუგდიდის მუნიციპალიტეტის გამგეობის სოციალური განყოფილების 2017 წლის პროგრამით „სოციალურად დაუცველი ოჯახების და მოწყვლადი ჯგუფების საყოფაცხოვრებო პირობების გაუმჯობესების მიზნით სხვადასხვა ორგანიზაციებისა და ფიზიკური პირების მიერ წარმოდგენილი პროექტების თანადაფინანსების პროგრამა“.