რეგიონები

ზუგდიდის გამგებელმა საზოგადოებას საქმიანობის ანგარიში წარუდგინა

ზუგდიდის მუნიციპალიტეტის გამგებელმა ლაშა გოგიამ, საზოგადოებას 9 თვის მუშაობის ანგარიში წარუდგინა - ამის შესახებ ინფორმაციას ზუგდიდის მუნიციპალიეტეტის გამგეობა ავრცელებს.

გამგებელმა საზოგადოებას განხორციელებული, მიმდინარე და დაგეგმილი პროექტები გააცნო და სოციალური და ჯანდაცვის კუთხით განხორციელებულ პროგრამებზე ისაუბრა.

2016 წლის დეკემბრიდან დღემდე ზუგდიდის მუნიციპალიტეტში 36 მილიონი ლარის მსხვილი ინფრასტრუქტურული პროექტი განხორციელდა. ამჟამად, 22 მსხვილი ინფრასტრუქტურული პროექტის განხორციელება მიმდინარეობს. 9 თვის განმავლობაში მოეწყო და რეაბილიტაცია ჩაუტარდა 23 624 მეტრ გზას. გზებზე მოეწყო გარე განათების ბოძები, რისთვისაც 111 000 ლარი დაიხარჯა.

2016 წლის 1 დეკემბრიდან დღემდე წყალმომარაგების ქსელი მოეწყო 7812 მეტრზე, რისთვისაც 314 930 ლარი დაიხარჯა. ამჟამად, წყალმომარაგების ქსელის მომწყობა 24 636 მეტრზე მიმდინარეობს, შენდება 4 ავზი, სამუშაოების სრული ღირებულება 826 067 ლარს შეადგენს.

დეკემბრიდან დღემდე ზუგდიდის მუნიციპალიტეტის გამგეობის სოციალური პროგრამებით 6 ათასამდე ბენეფიციარმა ისარგებლა. ამ ხნის განმავლობაში სოციალურ პროგრამებზე 400 ათას ლარამდე დაიხარჯა. გამგეობის ჯანდაცვის სამედიცინო მომსახურებისა და მედიკამენტების დაფინანსების პროგრამით კი 1311 მოქალაქე დაფინანსდა. სხვადასხვა სამედიცინო მომსახურებებზე ნახევარ მილიონ ლარამდე დაიხარჯა.

ზუგდიდის მუნიციპალიტეტში აქტიურად მიმდინარეობს მძიმე საყოფაცხოვრებო პირობების მქონე ოჯახებისთვის ახალი სახლების მშენებლობა. ახალ წელს ახალ სახლებში 27 სოციალურად დაუცველი ოჯახი შეხვდება. გასულ წლებში კი სახლები 41 ოჯახს გადაეცა.

ლაშა გოგიამ დღეს სახლების მფლობელებს სიმბოლური გასაღებები გადასცა.

ასევე, დაჯილდოვდნენ გამგეობის მიერ გამოცხადებულ ფოტოკონკურსში ,,წარმოაჩინე შენი სოფელი“გამარჯვებულები.

გამგებელმა საზოგადოებას, აგრეთვე მუნიციპალიტეტის განვითარების 4 წლიანი გეგმა წარუდგინა, რომელიც საკრებულოს მიერაა დამტკიცებული. 2018-2021 წლებში აშენდება და რეაბილიტაცია ჩაუტარდება 70-მდე გზას, რითაც მუნიციპალიტეტის სოფლებში ცენტრალურ და შიდა საგზაო ინფრასტრუქტურის ყველა პრობლემური ნაწილი მოწესრიგდება. აშენდება და რეაბილიტაცია ჩაუტარდება 14 ხიდს. განხორციელდება წყალმომარაგების 15 პროექტი. აშენდება და სრული რეაბილიტაცია ჩაუტარდება 22 საბავშვო ბაღს, აშენდება 4 სპორტული მოედანი. განხორციელდება მელიორაციის, სანიაღვრეების, ნაპირსამაგრების პროექტები. კეთილმოეწყობა პარკები, სოფლის ცენტრები, აშენდება მულტიფუნქციური საზოგადოებრივი ცენტრები, ამბულატორიები, დამონტაჟდება გარე განათებები.

ლაშა გოგიამ, შეკრებილებს ზუგდიდის მუნიციპალიტეტის გამგეობის ახალი პროექტიც გააცნო, რომელიც ნიჭიერი ახალგაზრდების უცხოეთში სწავლების დაფინანსებას გულისხობს. ზუგდიდის მუნიციპალიტეტი ყოველწლიურად 3 სტუდენტს დააფინანსებს და ვალდებულებად მიღებული განათლების მუნიციპალიტეტში გამოყენებას ჩაუდებს.