რეგიონები

ზაზა ოქუაშვილს უმაღლესი საბჭოს დეპუტატის უფლებამოსილება უკანონოდ შეუწყდა - აცხადებს ოპოზიცია

აჭარის უმაღლეს საბჭოში სხდომა ხმაურის ფონზე მიმდინარეობდა. დეპუტატები რიგგარეშე სხდომაზე "ომეგა ჯგუფის" დამფუძნებლისთვის და საბჭოს წევრისთვის, ზაზა ოქუაშვილისთვის დეპუტატის მანდატის შეწყვეტის საკითხზე მსჯელობდნენ.

სხდომა განცხადებებით დაიწყო, ურთიერთბრალდებები კი ხმაურში გადაიზარდა. "ნაციონალური მოძრაობა" ზაზა ოქუაშვილისთვის მანდატის შეჩერების საკითხის გადადებას დეპუტატის საქართველოში ჩამოსვლამდე ითხოვდა.

აჭარის უმაღლეს საბჭოში „ერთიანი ნაციონალური მოძრაობის" დეპუტატების თქმით, ზაზა ოქუაშვილის უფლებამოსილების შეწყვეტისათვის აჭარის უმაღლესი საბჭოს რეგლამენტი დაცული არ არის.

ოპოზიციის მიერ სხდომაზე აღინიშნა, რომ უკანონოა ახლა კენჭისყრა, რადგან წარმოდგენილია ოქუაშვილის განცხადების ელექტრონული ვერსია და არა დედანი, ორიგინალი განცხადების.

დეპუტატი ელგუჯა ბაგრატიონი ამბობს, რომ პოლიტიკური დევნის გამო, დეპუტატი იძულებულია, აჭარის უმაღლეს საბჭოს წევრობაზე უარი თქვას, რის გამოც დღევანდელ კენჭისყრაში „ერთიანი ნაციონალური მოძრაობას" მონაწილეობა არ მიუღია.

საბოლოოდ, ზაზა ოქუაშვილს აჭარის უმაღლესი საბჭოს დეპუტატის უფლებამოსილება შეუწყდა. გადაწყვეტილება 10 ხმით მიიღეს, წინააღმდეგი 4 დეპუტატი იყო.

ზაზა ოქუაშვილი უმაღლეს საბჭოში „პატრიოტთა ალიანსის“ პარტიული სიით მოხვდა. მან აჭარის საკანონმდებლო ორგანოს დეპუტატის მანდატის ვადამდე შეწყვეტის მოთხოვნის განცხადებით 20 დეკემბერს მიმართა.

შეგახსენებთ, „ომეგა ჯგუფის" დამფუძნებელმა, ზაზა ოქუაშვილმა ბიძინა ივანიშვილი ბიზნეს რეკეტის საქმეში ამხილა. „ომეგა ჯგუფისა" და სახელმწიფოს შორის წარმოქმნილი უთანხმოება რამდენიმე თვეა გრძელდება. ამ დაპირისპირების შედეგად ტელეკომპანია "იბერია“ დაიხურა.

"ომეგა ჯგუფის" დამფუძნებელი აცხადებდა, რომ სახელმწიფო მასზე რეკეტს ახორციელებდა და ამის დასადასტურებლად ფარული ვიდეო ჩანაწერებიც გამოქვეყნდა.