ეკონომიკა

ზაზა ოქუაშვილი წლის საუკეთესო ინვესტორად აღიარეს

საქართველოს საუკეთესო კომპანიები და ბიზნესმენები გამოავლინეს 10 ნოემბერს მედია ჰოლდინგ "ჯორჯიან თაიმსისა" და საზოგადოებრივი აზრისა და მარკეტინგული კვლევების კომპანია ,,გორბის“ მიერ გამართულ რიგით მე-17 ბიზნეს-რეიტინგის დაჯილდოებაზე.

წლის საუკეთესო ინვესტორად “ომეგა ჯგუფი” - ცნობილი ბიზნესნესმენი ზაზა ოქუაშვილი აღიარეს. მისი ქვეყანაში არყოფნის გამო ეს ჯილდო პირველმა ვიცე-პრემიერმა, ეკონომიკისა და მდგრადი განვითარების მინისტრმა დიმიტრი ქუმსიშვილმა ,,ომეგა ჯგუფის’’ გენერალურ დირექტორს, გიორგი ქურდაძეს გადასცა.

წლის ბიზნეს რეიტინგში „ომეგა ჯგუფი“ და ტელეკომპანია „იბერია“ ბიზნესის ეროვნული ჯილდოს მფლობელი გახდა.

საპატიო ჟიურის გადაწყვეტილებით „ომეგა ჯგუფი“ დაჯილდოვდა ნომინაციებში: უმსხვილესი ინვესტორი; ულტრათანამედროვე ტექნოლოგიები; ახალი სამუშაო ადგილები; მომსახურების უმაღლესი სტანდარტი და თბილისი მერმა დავით ნარმანიამ ოქროს სამკერდე ჯვარი და სერთიფიკატი გადასცა.

როგორც ,,ომეგა ჯგუფის’’ გენერალურ დირექტორმა, გიორგი ქურდაძემ მედიანიუსს განუცხადა, ,,ომეგა ჯგუფისა’’ და მისი დაფუძნებლის, ზაზა ოქუაშვილის საქმიანობა მოიცავს ბევრ სფეროს და მიმართულია ქვეყნის ეკონომიკის განვითარებისკენ.

,,ჩვენი კომპანია საქმიანობს საქართველოს ეკონომიკურ სივრცეში 1991 წლიდან. ამ ხნის განმავლობაში ჩვენმა ჯგუფმა ბიუჯეტში შეიტანა მილიარდ ხუთასი მილიონი ლარი. ეს არ არის პატარა ციფრი. ჩვენ ყოველთვის ლიდერი ვიყავით ბიუჯეტში შენატანების თვალსაზრისით და ყოველთვის ამით ვამაყობდით.

ჩვენ დასაქმებული გვყავს 2 000 მოქალაქემდე. ესეც დიდი მიღწევაა.

ჩვენი კომპანია ძალიან ბევრ სფეროს მოიცავს. იმედი გვაქვს, რომ კიდევ უფრო გავფართოვდებით. ეს ყველაფერი მოდის, რა თქმა უნდა, ჩვენი დამფუძნებლისგან, ბატონი ზაზა ოქუაშვილისგან, რომელიც ერთი წუთი არ ადუნებს თავის აზროვნებას და ყოველთვის მიმართულია იმისკენ, რომ რაც შეიძლება მეტი გააკეთოს საქართველოსთვის, უფრო მეტი ინვესტიცია მოიზიდოს ’’, - განაცხადა გიორგი ქურდაძემ.

მე-17 ტრადიციულ ბიზნესრეიტინგში ტელეკომპანია „იბერიას“ კი ჯილდო შემდეგ ნომინაციებში გადაეცა: ქართული ბიზნესის მხარდჭერა და პოპულარიზაცია.

ბიზნეს-რეიტინგის საზეიმო გალა ვახშამს საკანონმდებლო, აღმასრულებელი, ხელისუფლების წარმომადგენლები, ასევე ბიზნესმენები, დიპლომატიური კორპუსის, ადგილობრივი და უცხოური მედიის წარმომადგენლები ესწრებოდნენ.

პროექტის მიზანია ეროვნულ ბიზნესში ყველაზე წარმატებული დარგების განსაზღვრა, დიალოგის მხარდაჭერა ბიზნესს, ხელისუფლებასა და საზოგადოებას შორის.

მედია ჰოლდინგი "ჯორჯიან თაიმსი" და საზოგადოებრივი აზრისა და მარკეტინგული კვლევების კომპანია „გორბი“ ბიზნეს რეიტინგს 1995 წლიდან ატარებს.