რეგიონები

უკვე მიდის მუშაობა იმაზე, რომ გადასახადმა დაიწიოს - კომპანია “გაზკო+”

კომპანია “გაზკო+”-ში სენაკის აბონენტებისთვის ბუნებრივი აირის გაძვირებასთან დაკავშირებით პირველი განცხადება გაკეთდა.

კომპანიის წარმომადგენლის, დიმიტრი პაჭკორიას ინფორმაციით, აღნიშნული გადაწყვეტილება გაზის მიმწოდებელი კომპანიის ტარიფების ცვლილებამ გამოიწვია.

“2016 წლის დეკემბერში ჩვენ მომწოდებელ კომპანიასთან ახალი ხელშეკრულება გავაფორმეთ და გაზი უცხოურ ვალუტაში, თანაც სხვა ტარიფით შევიძინეთ. შესაბამისად, კომპანიას გააჩნია ვალდებულებები და ჩვენ მოგვიწია დერეგულირებადი აბონენტებისთვის ტარიფის გაძვირება. რის შესახებაც ისინი წინასწარ გავაფრთხილეთ. რაც შეეხება დერეგულირების მოხსნის საკითხს, ჩვენ იმედი გვაქვს, რომ მარეგულირებელი კომისია, მთავრობა და კომპანიები ისეთ გადაწყვეტილებას მივიღებთ და ტარიფები ისე დარეგულირდება, რომ მოსახლეობას ზედმეტად არ დააწვეს მხრებზე. შემიძლია გითხრათ, რომ უკვე მიდის მუშაობა იმაზე, რომ გადასახადმა დაიწიოს”, - განაცხადა დიმიტრი პაჭკორიამ.

შეგახსენებთ, რომ საკითხთან დაკავშირებნით დღეს განცხადება გაავრცელა ენერგეტიკის სამინისტრომ.

უწყება სენაკში ბუნებრივი აირის ტარიფის 68 თეთრამდე გაზრდის გამო შეშფოთებულია.

ენერგეტიკის სამინისტროს ინფორმაციით, ეს ყველაზე მაღალია ტარიფია მთელ საქართველოში.

,,ეს არის მინიმუმ უსამართლო გადაწყვეტილება ვინაიდან სახელმწიფო მთელი ამ წლების განმავლობაში და დღესაც მთელი მოსახლეობისთვის ინარჩუნებს სოციალურ ფასს გაზზე, გარე ფაქტორების და ბაზარზე არსებული ვითარების მიუხედავად ჩვენ ვახერხებთ იმას, რომ ეს შეღავათი - სოციალურ გაზზე მიიღოს თოთოეულმა ოჯახმა.

სამინისტროს დაწყებული აქვს ამ საკითხზე მუშაობა, როგორც აქამდე არაერთხელ იქნა გაცხადებული, მიზანშეწონილად მიგვაჩნია ნაწილობრივი დერეგულირების პრაქტიკის გაუქმება და შესაბამისად მოსახლეობისთვის ტარიფის დადგენა მარეგულირებელი კომისიის მიერ, ეს გადაწყვეტილება მომავალში გამორიცხავს მსგავს უსამართლო და მოსახლეობისთვის მოულოდნელ გადაწყვეტილებებს, ’’ - ნათქვამია ენერგეტიკის სამინისტროს განცხადებაში.

ნინო ექვთიმიშვილი