რეგიონები

ტყიბულში მეშახტეთა აქცია განახლდა

ტყიბულში მეორე დღეა მეშახტეების აქცია მიმდინარეობს. პროტესტის მონაწილეებს გაერთიანებული პროფკავშირებიც შეუერთდა, თუმცა მათ განსხვავებული შეხედულება აქვთ.

გაერთიანებული პროფკავშირების თავმჯდომარის მოადგილეს, თამაზ დოლაბერიძის შეფასებით, კონკრეტული პირების თანამდებობიდან გადაყენება შახტში მდგომარეობას ვერ გააუმჯობესებს. მისი თქმით, აუცილებელია შახტების დროებითი კონსერვაცია, ადგილზე ექსპერტების ჩართვა და სახელმწიფოს მხრიდან უსაფრთხოების ნორმების გაკონტროლება.

დოლაბერიძის აზრით, მხოლოდ ამის შემდეგ უნდა აღდგეს მუშაობა შახტში, მანამდე კი დასაქმებულებს ხელფასების ანაზღაურების გარანტია უნდა მიეცეთ. მისივე თქმით, ტყიბულში უნდა დაიწყოს პარალელურ რეჟიმში სახელმწიფოს მხრიდან ალტერნატიული სამუშაო ადგილების შექმნა.

ცნობისთვის, მეშახტეებმა გენერალური დირექტორის, ჯამბულ ჯაყელისა და სხვა პასუხისმგებელი პირების გადადგომის მოთხოვნით ხელმოწერების შეგროვება დაიწყეს.