მოზაიკა

თელავის ჭადრის გადასარჩენად საქართველოში გერმანელი სპეციალისტები ჩამოვიდნენ

თელავის ისტორიული ჭადარი გადარჩება - ქალაქის ცენტრში არსებული უძველესი ხე, რომლის ასაკიც 900 წელს აჭარბებს, საფრთხის წინაშეა და მისი სიცოცხლისუნარიანობის შესანარჩუნებლად პროფესიონალური სამუშაოების ჩატარებაა საჭირო. უკვე რამდენიმე წელია ქალაქის ხელმძღვანელობა ისტორიული ძეგლის გადასარჩენად მუშაობს, თუმცა კონკრეტული სამუშაოები ადგილობრივი სპეციალისტებისა და არსებული მეთოდოლოგიით ვერ განხორციელდა.

პრობლემის მოგვარების მიზნით, გარემოსა დაცვისა და ბუნებრივი რესურსების სამინისტროს სატყეო პოლიტიკის სამსახურის ხელმძღვანელმა კარლო ამირგულაშვილმა არასამთავრობო ორგანიზაციას „პროფესიონალთა გაერთიანება ხის მოვლისათვის საქართველოში“ მიმართა, რომლის ხელმძღვანელი დავით სამხარაძე ერთადერთი სპეციალისტია საქართველოში, რომელიც ხის მოვლის თანამედროვე ევროპულ სტანდარტებს სწორედ გერმანიაში მოღვაწეობისას დაეუფლა. სწორედ დავით სამხარაძის მოწვევით საქართველოში გერმანელი სპეციალისტები დეტლეფ კოხი და ბენიამინ ალლგაია ჩამოვიდნენ და თელავის ჭადრის გადარჩენისთვის საჭირო ღონისძიებების განხორციელებას შეუდგნენ.

„ამ ტექნიკითა და მეთოდოლოგიით საქართველოში ხე-მცენარის სხვლა-ფორმირება პირველად ტარდება. მიმდინარეობს უსაფრთხოებითი ჭრები, სხვლა-ფორმირება სიმძიმის ბალანსის ართმევის მიზნით, რათა არ მოხდეს ხის დარჩენილი ცოცხალი შტამპების გადატეხვა. გადატეხვის შემთხვევაში გაჩნდება ახალი ინფექციის წყარო, რაც მიგვიყვანს ხის საბოლოო ხმობამდე. ამასთანავე, სხვლა-ფორმირების დასრულების შემდეგ ჭადრის ტოტები გაიკვრება სპეციალური სტატიკური ბაწრებით, რომლებიც გერმანიიდან ჩამოვიდა. ხე გახდება მქსიმალურად გამტარი, რადგან შემცირებული იქნება ჰაერნაკადების შემთხვევაში მისი ტოტების მოძრაობის ამპლიტუდა,“ - განმარტავს არასამთავრობო ორგანიზაციის ხელმძღვანელი დავით სამხარაძე.

აღსანიშნავია, რომ ამ უპრეცედენტო ღონისძიებებიდან გამომდინარე, არასამთავრობო ორგანიზაცია „პროფესიონალთა გაერთიანება ხის მოვლისათვის საქართველოში“ 27 ოქტომბერს საქართველოში ხის მომვლელის დღედ გამოაცხადებს.