რეგიონები

თავზე ედგნენ კომისიის წევრებს ცალკე ჟურნალისტები, ცალკე დამკვირვებლები - კობა სუბელიანი

მარნეულში, სოფელ ყიზილაჯლოს #48 საარჩევნო უბანზე ნაციონალური მოძრაობის წარმომადგენელი, კობა სუბელიანი აღნიშნული საარჩევნო უბნისთვის გამოყოფილი ოთახით უკმაყოფილოა.

,,ამხელა სოფელში ამ პატარა ოთახზე დიდი ოთახი ვერ ნახეს? შეამჩნევდით, როგორი სივიწროვეა. შეუძლებელია აქ არჩევნების ჩატარების კომფორტული პროცესის გამართვა. თავზე ედგნენ კომისიის წევრებს ცალკე ჟურნალისტები, ცალკე დამკვირვებლები. კუდის მოსაბრუნებელი ადგილი არ არის. მაინც აქ ვართ, რომ უზრუნველვყოთ მშვიდ გარემოში არჩევნების ჩატარება’’, - განუცხადა ჟურნალისტებს კობა სუბელიანმა.

საარჩევნო უბანზე მყოფი ჟურნალისტებისა და დამკვირვებლების სიმრავლით ხსნის ამ დროისათვის დაფიქსირებულ დარღვევებს ადგილზე მყოფი ,,ქართული ოცნების’’ წარმომადგენელი, მამუკა მდინარაძე.

,,ჟურნალისტების, დამკვირვებლების, წარმომადგენლების დიდმა რაოდენობამ მართლაც შეაფერხა პროცესი. ცოტა გვიანაც კი გაიხსნა უბანი. შემდეგ დაფიქსირდა რამდენიმე დარღვევა, რომელიც ვფიქრობ, რომ ისეთ გავლენას, რომელსაც შეიძლება უბნის გაუქმება მოყვეს, ვერ მოახდენს. თუ რაიმე დარღვევაა, ამას როგორც მე ვუყურებ, აბსოლუტურად პედანტურად აფიქსირებენ დამკვირვებლები. თუ იქნება საფუძვლიანი საჩივარი, მე ვფიქრობ, რომ კომისიაც ადეკვატურ გადაწყვეტილებას მიიღებს’’, - განუცხადა ჟურნალისტებს მდინარაძემ.

ნინო ექვთიმიშვილი