ეკონომიკა

თამბაქო კიდევ ძვირდება

თამბაქოზე ფასი, სავარაუდოდ, მიმდინარე თვის ბოლოდან ან თებერვლის დასაწყისიდან მოიმატებს, - ამის შესახებ bm.ge-ის British American Tobacco (BAT)-ს კორპორატიულმა და იურიდიულმა დირექტორმა ზვიად სხვიტარიძემ განუცხადა.

მისი თქმით, პროგნოზი რთულია, თუმცა თამბაქოზე ფასები დამოკიდებულია სამ ფაქტორზე. ესენია - აქციზი, ინფლაცია და ეროვნული ვალუტის კურსი.

„ვფიქრობ, ფასების ზრდა გაგრძელდება. ეს დამოკიდებულია რამდენიმე ფაქტორზე - პირველი არის ის, რომ გაზრდილი აქციზი ჯერ არ არის ასახული ფასში, თუმცა ასევე მნიშვნელოვანია კიდევ ორი ფაქტორი, ინფლაცია და ლარის კურსის ცვალებადობა, რომელიც ასევე განაპირობებს ფასების ზრდას, იქიდან გამომდინარე, რომ ჩვენ ყველა იმპორტიორთან ფასი დაფიქსირებული გვაქვს მყარ ვალუტაში - დოლარსა და ევროში. შესაბამისად, ეს სამი ფაქტორი - აქციზი, კურსი და ინფლაცია იწვევს ფასების ზრდას. კონკრეტული თარიღის დასახელება, თუ როდის და რამდენით მოიმატებს ფასები, არავის შეუძლია, მაგრამ სავარაუდოდ ეს მოხდება იანვრის ბოლოს ან თებერვლის პირველ ნახევარში. რა თქმა უნდა, ეს ზრდა იქნება თანდათანობითი და წლის განმავლობაში გაგრძელდება. დაახლოებით, 40 თეთრის ფარგლებში იქნება მატება, თუმცა არა - ერთიანად. ეს იქნება თანდათანობით, შეიძლება პირველ ეტაპზე ეს იყოს 20 თეთრი“, - განაცხადა სხვიტარიძემ.