რეგიონები

სვანეთში, სტიქიის ზონაში 4 განადგურებული ხიდის ნაცვლად განათავსებენ დროებით ხიდებს

რეგიონული განვითარებისა და ინფრასტრუქტურის სამინისტროს განცხადებით, საავტომობილო გზების დეპარტამენტის ინჟინრები, სტიქიის ზონაში 4 განადგურებული ხიდის ნაცვლად დროებით ხიდებს განათავსებენ, რათა მოსახლეობამ შეუფერხებლად შეძლოს ერთი ნაპირიდან მეორეზე გადასვლა.

„მთელი ღამის განმავლობაში არ შეწყვეტილა სტიქიის სალიკვიდაციო სამუშაოები სოფელ ჭუბერში. საქართველოს რეგიონული განვითარებისა და ინფრასტრუქტურის სამინისტრო, სხვა სახელმწიფო უწყებებთან ერთად, პირველივე წუთებიდან ჩართულია სამუშაოებში.

ამ დროისთვის, თითქმის დასრულებულია გზის გაწმენდითი სამუშაოები, მიმდინარეობს კალაპოტის გამაგრება, ათეულობით მძიმე ტექნიკა მუშაობს მდინარე ნენსკრაზე, რათა მდინარე ძველ კალაპოტს დაუბრუნდეს.

სტიქიის ზონაში იმყოფებიან საგზაო დეპარტამენტის რეგიონული ოფისების და კონტრაქტორი ორგანიზაციების წარმომადგენლები, ასევე სახელმწიფო სამშენებლო კომპანიის სპეციალისტები, რომლებიც 24-საათიან რეჟიმში კოორდინაციას უწევენ გაწმენდით სამუშაოებს.

მობილიზებულია 5 ერთეული მძიმე ტექნიკა, რომელიც მთელი ღამის განმავლობაში აწარმოებდა გაწმენდით სამუშაოებს. საავტომობილო გზების დეპარტამენტის ინჟინრები, სტიქიის ზონაში დილიდან, 4 განადგურებული ხიდის ნაცვლად განათავსებენ დროებით ხიდებს, რათა მოსახლეობამ შეუფერხებლად შეძლოს ერთი ნაპირიდან მეორეზე გადასვლა“, -წერია სამინისტროს განცხადებაში.

ცნობისთვის - უხვი ნალექის გამო გუშინ მთის დიდი ნაწილი ჩამოიშალა, რასაც მოჰყვა მდინარე ნენსკრას ადიდება. დატბორილია მიმდებარე ტერიტორია. სოფელი ჭუბერი და კიდევ რამდენიმე დასახლება გარესამყაროსაა მოწყვეტილი. ჩამოწოლილმა მეწყერმა და მოვარდნილმა ღვარცოფმა სოფლებთან დამაკავშირებელი ხიდები და რამდენიმე სახლი წაიღო.