რეგიონები

სოციალურ საცხოვრებელში არსებული რთული ვითარების გამო ბენეფიციარები ქუთაისის მერის მოადგილეს ხვდებიან

ქუთაისში სოციალური საცხოვრებლის ბინადრები ქალაქის ვიცე-მერ იუზა უგულავას ხვდებიან. მოქალაქეებმა შეშფოთება გამოთქვეს, რომ წინა წელს გახსნილ შენობაში ჭერი მესამეჯერ ჩამოინგრა. სოციალური საცხოვრებლის ბინადრებმა ალტერნატიულ ფართში გადაყვანა მოითხოვეს, რადგან მათი თქმით, იქ ცხოვრება საფრთხის შემცველია.

გარდა ამისა, საცხოვრებლის ბინადრებმა უნდობლობა გამოუცხადეს ლევან სამხარაულის ბიუროს მიერ დადებულ დასკვნას. ერთ-ერთი ბინადრის, მირანდა ნემსიწვერიძის განცხადებით, დასკვნა გაყალბებულია.

„მოვითხოვთ, გადაგვიყვანონ სხვა შენობაში. აქ ცხოვრება არის შეუძლებელი. ბავშვები გვყავს და ვართ ყოველდღიური საფრთხის ქვეშ. დასკვნა რომელიც დადეს, არის ყალბი, რადგან როგორც გვეუბნებიან, დასკვნაში წერია, რომ ჩვენ დავაზიანეთ შენობა",- განაცხადა ნემსიწვერიძემ.

„ქუთაისი პოსტის“ ინფორმაციით, შეხვედრა ხმაურით დაიწყო, საცხოვრებლის ბინადრებმა უგულავა მათ მიმართ აგრესიაში დაადანაშაულეს.

„სად ნახეთ თქვენ ჩემი აგრესია?“, - უთხრა მერის მოადგილემ საცხოვრებლის ბინადრებს.

დღეს დილიდან ბენეფიციარები ქუთაისის მერიასთან შეიკრიბნენ. მათ სოლიდარობა გამოუცხადა „ნაციონალური მოძრაობის“ წევრმა გიგა შუშანიამ.

ნიკეას ქუჩაზე 80 ოჯახისთვის მოწყობილ სოციალურ საცხოვრისში ჭერი მესამედ ჩამოინგრა. მერიის დაკვეთით უკვე ჩატარდა ექსპერტიზა. 6 ივნისს ქუთაისის მერიამ გაავრცელა ინფორმაცია იმის შესახებ, რომ ექსპერტიზის დასკვნა საგამოძიებო უწყებებს გადაეგზავნა.

„ლევან სამხარაულის სახელობის სასამართლო ექსპერტიზის ეროვნული ბიუროს დასკვნით ნიკეას ქუჩა N40გ-ში მდებარე სოციალურ საცხოვრისში იკვეთება მთელი რიგი ხარვეზები, რომლებიც საჭიროებს დამატებით მოკვლევას კომპეტენტური ორგანოების მიერ და შესაბამისად, ექსპერტიზის დასკვნა ქუთაისის მერიის მიერ გადაიგზავნა სამართალდამცავ ორგანოში",-წერია განცხადებაში.

ქუთაისში, ნიკეას ქუჩაზე, კავშირგაბმულობის ყოფილ შენობაში, სოციალური საცხოვრისი 2017 წლის 1 ოქტომბერს გაიხსნა.

„ქუთაისი პოსტის“ ცნობით, პრობლემები ხალხის შესახლების დღიდან დაიწყო. მხოლოდ იმის გამო, რომ კომპანია "სანომ" საცხოვრისის ოთახები არასწორი კონფიგურაციით მოაწყო, ბენეფიციარებს მთელი ზამთრის გატარება ბუნებრივი აირის გარეშე მოუწია. შესახლებიდან 6 თვეში კი შენობაში ჭერი ორჯერ ჩამოინგრა.

უსახლკაროებისთვის თავშესაფრის მოსაწყობად კომპანია „სანოს“ ადგილობრივი ბიუჯეტიდან 2 500 000 ლარი გამოეყო.