ეკონომიკა

სიგარეტი გაძვირდა

თამბაქოს აქციზის ფასი 10-დან 30 %-მდე გაიზარდა, რამაც სიგარეტის გაძვირება გამოიწვია.

თამბაქოს ფასმა 50-დან 80 თეთრამდე უკვე მოიმატა, თუმცა, იმპორტიორები ფასის კიდევ უფრო მეტ ზრდას აანონსებენ.

ეკონომისტ ზვიად ხორგუაშვილის ვარაუდით, სიგარეტზე ფასის ზრდა მწეველთა რაოდენობაზე გავლენას არ მოახდენს. მისივე თქმით, ეს მიმართულია იმაზე, რომ მეტი ფული შევიდეს სახელმწიფო ბიუჯეტში.

„სიგარეტი მიეკუთვნება ისეთ პროდუქტებს, რომლებზეც, ფასის ზრდასთან ერთად, მომხმარებელი მკვეთრად არ მცირდება. ეს ნიშნავს იმას, რომ ფასი თუ გაიზრდება, მკვეთრად არ შემცირდება მწეველების რაოდენობა. მეტიც, ძალიან მცირედით შემცირდება. მეორე, მომხმარებელი მავნე პროდუქტიდან გადაერთვება კიდევ უფრო მავნეზე, ნაკლებ ღირებულ, ნაკლებ ფასიან სიგარეტზე. რაც შეეხება მიზეზს, მიზეზი არის კვლავაც იგივე, ეს არის ის, რომ მეტი ფული შევიდეს სახელმწიფო ბიუჯეტში და მიზეზია ის, რომ მომხმარებელმა კიდევ მეტი გადაუხადოს მთავრობას თავისი ჯიბიდან“,- განაცხადა ხორგუაშვილმა.

თამბაქოს ინდუსტრიის წარმომადგენელთა თქმით, ამ გადაწყვეტილებით გაიზრდება თამბაქოს არალეგალური, ე.წ. შავი ბაზრიდან შემოტანის ფაქტები, მათ შორის, აფხაზეთიდან და სომხეთიდან.

ჯანდაცვის სამინისტროში ადასტურებენ, რომ სახელმწიფოს მხრიდან გადადგმული ნაბიჯების მიუხედავად მწეველთა რაოდენობა არ შემცირდა, თუმცა, შემცირდა მოხმარებული ღერების რაოდენობა.