მოზაიკა

საქართველოში ახალი ინდური ფილმის გადაღებები დაიწყო

საქართველოში კინოინდუსტრიის წახალისების პროგრამის „გადაიღე საქართველოში“ ფარგლებში, მისი ამოქმედებიდან 7 თვეში კიდევ ერთი, რიგით მეხუთე პროექტი ხორციელდება.

მეწარმეობის განვითარების სააგენტოს ინფორმაციით, ახალი, ინდური მძაფრსიუჟეტიანი მხატვრული ფილმის “პსვ გარუდა ვეგას” გადაღებები 1 ნოემბერს დაიწყო. გადასაღებ მოედანს დღეს საქართველოს ეკონომიკისა და მდგრადი განვითარების მინისტრის მოადგილე, ქეთევან ბოჭორიშვილი ეკონომიკის სამინისტროს მეწარმეობის განვითარების სააგენტოს დირექტორთან, ანი კვარაცხელიასთან ერთად ესტუმრა.

როგორც მეწარმეობის განვითარების სააგენტოში აღნიშნავენ, ინდური კომპანია საქართველოს სხვადასხვა რეგიონებში, მათ შორის ბორჯომში, კახეთში, ჭიათურაში, ბათუმსა და თბილისში 20 ნოემბრის ჩათვლით გადაიღებს მორიგ ფილმს. თბილისის შემდეგ ისინი ბათუმს ესტუმრებიან, მოგვიანებით კი, გადაღებები კახეთში გაგრძელდება.

როგორც საქართველოს ეკონომიკისა და მდგრადი განვითარების მინისტრის მოადგილემ, ქეთი ბოჭორიშვილმა განაცხადა, ეს არის რიგით მეხუთე პროექტი, რომელიც ,,გადაიღე საქართველოში“ ფარგლებში ხორციელდება.

„ამ პროექტმა ასობით ადგილობრივი ადამიანი დაასაქმა. ,ფილმის გადაღებები 30 დღე გაგრძელდება. გადაღებები არა მარტო თბილისში, არამედ საქართველოს სხვადასხვა რეგიონში მიმდინარეობს. პროექტში ჩართულია არაერთი ქართული კომპანია, რომელიც გადამღებ ჯგუფს შესაბამის დახმარებას უწევს,“ - განაცხადა ქეთი ბოჭორიშვილმა.

რაც შეეხება ფილმის რეჟისორსა და მსახიობებს, მათ განცხადებით, საქართველოს კინოწარმოების დიდი პოტენციალი გააჩნია.

,,მოხარულები ვართ აქ ყოფნით. საქართველო ძალიან ლამაზი ქვეყანაა. წელიწადის ამ დროს თქვენთან ცივა, თუმცა ამას გადაღებებისთვის ხელი არ შეუშლია. ქართველები მეგობრულები არიან და ძალიან გვეხმარებიან. ჩვენ, გადამღებ ჯგუფთან ერთად ძალიან კარგ პროდუქტს ვქმნით. სტარტი 13 ოქტომბრიდან ავიღეთ. გადაღებები ჯერ ბათუმში, ამჟამად თბილისში მიმდინარეობს, ხვალ ისევ ბათუმში ვბრუნდებით, შემდეგ კი კახეთში გადავინაცვლებთ. მთლიანობაში დროს სასიამოვნო ვატარებთ, ვიღებთ გამოცდილებას და ვიმედოვნებთ, რომ ამ გამოცდილების მიღებას სამომავლოდაც დავგეგმავთ“ - განაცხადა ფილმის რეჟისორმა პრავეენ სატარუმ.

„მეწარმეობის განვითარების სააგენტოს“ ინფორმაციით, პროექტის ფარგლებში საქართველოში 790 000 ლარი დაიხარჯება და გადაღებების პირველ ეტაპზე 20 მსახიობი დასაქმდება. პროგრამის ფარგლებში უკვე მიმდინარე პროექტების განხორციელების შედეგად საქართველოში ჯამში 7 310 000 მილიონი ლარი დაიხარჯება, ხოლო ადგილობრივად 650 ადამიანი დასაქმდება. რაც შეეხება სამომავლო გეგმებს, ამჟამად სხვადასხვა საერთაშორისო პროდიუსერებთან იმდინარეობს მოლაპარაკებები დამატებით რამდენიმე ფილმის გადაღებაზე საქართველოში.

,აღსანიშნავია, რომ ამავე პერიოდში საქართველოში განხორციელდა არაერთი რეკლამის თუ მუსიკალური ვიდეორგოლის გადაღებები, რაც ასევე ხელს უწყობს ქვეყნის, როგორც აღმოსავლეთ ევროპის საუკეთესო გადასაღები ლოკაციის პოპულარიზაციას.’’, - აცხადებენ მეწარმეობის განვითარების სააგენტოში.