რეგიონები

საქართველო-დაღესტნის საზღვარზე აფეთქებას ერთი ქართველი მესაზღვრე ემსხვერპლა

საქართველო-დაღესტნის საზღვარზე აფეთქების შედეგად, ერთი ქართველი მესაზღვრე დაიღუპა.

რუსთავი 2-ის ინფორმაციით, შემთხვევა გუშინ ლაგოდეხის მე-5 სამმართველოში მოხდა, რომელიც დაღესტნის საზღვართან არსებულ მონაკვეთს აკონტროლებს.

აფეთქების შედეგად მძიმედ დაშავდა კიდევ 3 მესაზღვრე.

სამმართველოს ერთ-ერთი მესაზღვრე რუსთავი 2-თან სატელეფონო საუბარში ამბობს, რომ მესაზღვრეები კარავში იმყოფებოდნენ, რა დროსაც გაზის ბალონი აფეთქდა.

,,ბიჭები იყვნენ მაღლა დაღესტნის საზღვართან კარავში და ენთოთ შეშის ღუმელი. ამ ღუმელის გვერდით მდგარა 4-კილოიანი გაზის ბალონი. სავარაუდოდ, ის ბალონი გახურდა და აფეთქდა. ვინც ახლოს იწვა, რუსთაველი მესაზღვრე, ის დაიღუპა, სამი კი დაიწვა“, - აცხადებს მესაზღვრე.

დაშავებულთაგან 2 უკვე გადმოყვანილია თბილისში, დამწვრობის ცენტრში.

ცენტრის ხელმძღვანელის, გუგა ქაშიბაძის განცხადებით, ორი მესაზღვრე მძიმე მდგომარეობაში დამწვრობის ცენტრში გადაიყვანეს და მათ შესაბამისი პროცედურები უტარდებათ.

,,ერთთან გვაქვს 27% დამწვრობა, მეორესთან 45% დამწვრობა“, - ამბობს გუგა ქაშიბაძე.

მომხდარ ფაქტთან დაკავშირებით საქმე გაუფრთხილებლობით სიცოცხლის მოსპობის მუხლით აღიძრა.