რეგიონები

სამუშაო ადგილზე ყოველი ხუთი ადამიანიდან ერთს ფსიქიკური ჯანმრთელობის პრობლემები აქვს

დღეს მსოფლიო ჯანდაცვის ორგანიზაციის მხარდაჭერით ფსიქიკური ჯანმრთელობის საერთაშორისო დღე აღინიშნება. ყოველწლიურად ის ერთ კონკრეტულ პრობლემას ეძღვნება, 2017 წელი კი ეთმობა ფსიქიკურ ჯანმრთელობას სამუშაო ადგილზე.

დღეს ქუთაისი პირველად მასპინძლობს ფსიქიკური ჯანმრთელობის დღისადმი მიძღვნილ ღონისძიებებს. ქალაქში შემდეგი აქტივობებია დაგეგმილი:

13:00-14:00 სთ: აკაკი წერეთლის სახელობის სახელმწიფო უნივერსიტეტში გაიმართება საჯარო ლექცია თემაზე „ერთად - უკეთესი ფსიქიკური ჯანმრთელობისთვის“.

15:30-17:00 სთ: ვ.ანჯაფარიძის სახელობის სკვერში ფსიქიკური პრობლემების მქონე პირთა მხარდამჭერი აქცია გაიმართება. იქნება მუსიკალური წარმოდგენა სტუდენტების მონაწილეობით, ფსიქიკური პრობლემების მქონე პირთა ნამუშევრების გამოფენა, აკაკი წერეთლის სახელობის უნივერსიტეტსა და ფსიქიკური ჯანმრთელობის ცენტრს შორის ურთიერთთანამშრომლობის მემორანდუმის ხელმოწერა.

ღონისძიების ორგანიზატორები არიან, აკადემიკოს ბ. ნანეიშვილის სახ. ფსიქიკური ჯანმრთელობის ეროვნული ცენტრი და აკაკი წერეთლის სახელობის სახელმწიფო უნივერსიტეტი, ხოლო ღონისძიების პარტნიორები არიან „ალიანსი უკეთესი ფსიქიკური ჯანმრთელობისთვის“ და „საქართველოს ფსიქიატრთა საზოგადოება“.

ჯანმრთელობის მსოფლიო ორგანიზაციის მონაცემებუთ, სამუშაო ადგილზე ყოველი ხუთი ადამიანიდან ერთს ფსიქიკური ჯანმრთელობის პრობლემები აქვს. აქციის ორგანიზატორების განმარტებით, ამ ღონისძიებით ისინი ცდილობენ, ჩართონ ბიზნესის წარმომადგენლები, დამსაქმებლები, ადამიანის უფლებადამცველები, ფსიქიკური ჯანმრთელობის პროვაიდერები, ოჯახები, ბენეფიციარები და საზოგადოების სხვა ჯგუფები ფართო დისკუსიაში სამუშაო ადგილზე ფსიქიკური ჯანმრთელობის გაუმჯობესების ხელშეწყობისათვის.

ღონისძიების ორგანიზატორების ინფორმაციით, მსოფლიო ეკონომიკური ფორუმის მონაცემებით, 2010 წელს ფსიქიკურ ჯანდაცვაზე წლიური გლობალური ხარჯი 2.5 ტრილიონი აშშ დოლარი იყო და ეს რიცხვი 2030 წლისთვის 6 ტრილიონი აშშ დოლარი გახდება. მსოფლიო ბანკმა ფსიქიკური ჯანმრთელობა გლობალური განვითარების პრიორიტეტად გამოაცხადა, რაც აღიარებს ფსიქიკური ჯანმრთელობის გადამწყვეტ გავლენას ეკონომიკურ განვითარებასა და კეთილდღეობაზე.