რეგიონები

სამტრედიის სავაგონო დეპოში დასაქმებული მუშაობის დროს გარდაიცვალა

სამტრედიის სავაგონო დეპოში დასაქმებული რ.თ, სამუშაო საათებში, საკუთარი უფლებამოსილების შესრულების დროს გარდაიცვალა.

რკინიგზელთა ახალი პროფკავშირის ხელთ არსებული წინასწარი ინფორმაციით, რკინიგზელი გულის შეტევით გარდაიცვალა.

პროფკავშირის შრომის ინსპეტორები ფაქტს ადგილზე შეისწავლიან და უახლოეს დღეებში დადგინდება - დაედო თუ არა საფუძვლად უბედურ შემთხვევას შრომის პირობების დარღვევა და სავაგონო დეპოში არსებული ჯანმრთელობისთვის საფრთხის შემცვლელი გარემო.

„რკინიგზაში ძალიან მძიმე მდგომარეობაა შრომის პირობებისა და უსაფრთხოების მხრივ , რაზეც წელიწადნახევრის წინ ჩატარებული შრომის ინსპექციის დასკვნაც მოწმობს. სამწუხაროდ, ის, რეკომენდაციები, რაც გავეცით, საქართველოს რკინიგზის მიერ არ სრულდება. რაც შეეხება სამტრედიის სავაგონო დეპოს, იქ დარღვეულია ჰიგიენასთან, ხმაურთან და კონდიცირებასთან დაკავშირებული ნორმები. ბევრი სამუშაო, მათ შორის ვაგონის ბორბლების გადაზიდვა სრულდება ხელით. არსებულ შრომით პირობებს სისტემატურად იქ მომუშავე ადამიანის ჯანმრთელობაზე უარყოფითი გავლენის მოხდენა შეუძლია. აუცილებელია დადგინეს, გახდა თუ არა რკინიგზელის გარდაცვალების მიზეზი შრომის პირობები“, – ამბობს "რკინიგზელთა ახალი პროფკავშირის" თავმჯდომარე ილია ლეჟავა.

ამასთან, როგორც პროფკავშირებში აცხადებენ, პრობლემებს ემატება ისიც, რომ 2016 წლიდან რკინიგზაში დასაქმებულებს სიცოცხლის დაზღვევა მოეხსნათ, რაც გარდაცვალების შემთხვევაში ოჯახისთვის 3000 ლარიანი კომპენსაციის გაცემას გულისხმობდა.