რეგიონები

სამეგრელო-ზემო სვანეთის რეგიონის ცენტრალურ გზებზე გაწმენდითი სამუშაოები მიმდინარეობს

სამეგრელო-ზემო სვანეთის მხარეში სახელმწიფო რწმუნებულის-გუბერნატორის ადმინისტრაციის პრესსამსახურის ცნობით, რეგიონის ცენტრალურ გზებზე დილიდან გაწმენდითი სამუშაოები კვლავ განახლდა.

ამ დროისთვის გზები გაწმენდილია ტყაიას, ჩხორიას, გრიგოლიშის, ჭაქვინჯის, ჯიხაშკარის მიმართულებით, სხვა ადმინისტრაციულ ერთეულებში კი ტექნიკა გასულია და გაწმენდითი სამუშაოები ყველა სოფლის მიმართულებით ჩატარდება. დიდთოვლობამ ელექტროგადამცემი ხაზებიც დააზიანა, რის გამოც ამ დროისთვის ელექტროენერგია არ მიეწოდება გრიგოლიშის, რიყეს და ჭკადუაშის ადმინისტრაციულ ერთეულებს. „ენერგო პრო ჯორგია“ პრობლემურ ადგილებში სამუშაოებს აწარმოებს და მოსახლეობას ელექტროენერგიით მომარაგება უახლოეს მომავალში აღუდგებათ.

ჩხოროწყუს მუნიციპალიტეტში თოვლის საფარი 30-40 სანტიმეტრს აღწევს. ამ ეტაპზე მიმდინარეობს როგორც სახელმწიფო მნიშვნელობის, ასევე შიდა საუბნო გზების გაწმენდითი სამუშაოები.

ელექტროენერგია 13 ადმინისტრაციული ერთეულიდან არ მიეწოდება სოფელ ნაკიანს, მუხურს, თაიას, ლესიჭინესა და ჭოღის ცალკეულ უბნებს. „ენერგო–პრო ჯორჯიას“ ჩხოროწყუს ფილიალის დირექტორის განმარტებით ყველა დაზიანებულ უბანში გასულია ტექნიკური სამსახური და ელექტროენერგია მოსახლეობას უახლოეს საათებში აღუდგება.

ზუგდიდი-ჯვარი-მესტია-ლასდილის საავტომობილო გზის კმ30-188 (ჯვარი-უშგული) მონაკვეთზე აკრძალულია მისაბმელიანი, ნახევრადმისაბმელიანი ავტოტრანსპორტის და 30 ადგილზე მეტი ტევადობის ავტობუსების მოძრაობა, ხოლო დანარჩენი სახის ავტოტრანსპორტის მოძრაობა მოძრაობა დასაშვებია მოცურების საწინააღმდეგო ჯაჭვების გამოყენებით. ორი და მეტი წამყვანი ხიდის მქონე ავტოტრანსპორტის მოძრაობა თავისუფალია.