რეგიონები

რუსთავის „აზოტთან“ ქარხნიდან გათავისუფლებული მუშები საპროსტესტო აქციას მართავენ

რუსთავში „აზოტის“ ქარხანასთან საწარმოდან გათავისუფლებული მუშები აქციას მართავენ და სამსახურში აღდგენას ითხოვენ.

რუსთავის პროფკავშირის წარმომადგენლის თქმით, ისინი პროტესტის ორ ფორმას მიმართავენ. მისი განცხადებით, გათავისუფლებული მუშები იქამდე გააგრძელებენ აქციებს, სანამ ადმინისტრაცია მათთან მოლაპარაკებებს არ დაიწყებს. ასევე იგეგმება სარჩელის შეტანა სასამართლოში თანამშრომელთა გათავისუფლებისა და „კაბალური პირობების შემცველი კონტრაქტების გაუქმების“ შესახებ.

რუსთავის პროფკავშირის წევრმა „ინფო რუსთავთან“ საუბარში განაცხადა, რომ, სავარაუდოდ, იგეგმება კიდევ ერთი მასშტაბური გათავისუფლება. თუმცა მან იქვე აღნიშნა, რომ ინფორმაცია დამტკიცებული არაა და დაზუსტებას მოითხოვს.

შეგახსენებთ, რომ 26 იანვარს სს „რუსთავის აზოტმა“ 330-მდე ადამიანი გაათავისუფლა.

როგორც „მედიანიუსს“ აზოტის პრესსამსახურის წარმომადგენელმა, ზვიად კეჭაყმაძემ განუცხადა, ამჟამად კომპანიაში რეორგანიზაციის პროცესი მიმდინარეობს, რადგან საწარმოს მფლობელი შეეცვალა. კომპანია შპს-დან სააქციო საზოგადოება „რუსთავის აზოტად“ გადაიქცა.

კეჭაყმაძე ამბობს, რომ კომპანია თანამშრომელთა ხელახალ მიღებასა და მათთან ხელშეკრულების დადებას აპირებს. დაბრუნდებიან თუ არა გათავისუფლებული მუშები, ჯერჯერობით უცნობია.

გუშინ, თბილისში ჟვანიას მოედანზე გათავისუფლებული მუშების მხარდამჭერი მსვლელობა მოაწყვეს მეტალურგთა, მეშახტეთა და ქიმიურ მრეწველობაში დასაქმებულთა პროფკავშირის წარმომადგენლებმა და სტუდენტურმა მოძრაობამ „მწვანე მუშტმა“. მსვლელობა „საქართველოს ბანკის“ ცენტრალური ოფისისკენ გაიმართა. აქციის მონაწილეთა თქმით, აქცია იმიტომ ჩატარდა საქართველოს ბანკთან, რადგან კომპანია ქარხნის მმართველი პარტნიორია.

ანა მებურიშვილი