რეგიონები

რელიგიის საკითხთა სააგენტომ სოფელ მოხეში არსებულ სადავო შენობასთან დაკავშირებით ორი წინადადება შეიმუშავა

რელიგიის საკითხთა სახელმწიფო სააგენტომ ადიგენის სოფელ მოხეში არსებული სადავო შენობის საკითხზე სპეციალური კომისიის სხდომა გამართა.

დასკვნით სიტყვაში სააგენტოს თავმჯდომარემ ზაზა ვაშაყმაძემ განაცხადა, ე.წ მოხეს კომისიამ მიიღო გადაწყვეტილება შესთავაზოს როგორც მუსლიმ, ისე მართლმადიდებელ მოსახლეობას ორი კონკრეტული წინადადება.

„კერძოდ, პირველი, სოფელ მოხეში მუსლიმი მრევლის ლოცვის პრობლემის მოგვარების მიზნით, სახელმწიფო, ადგილობრივი ხელისუფლების ჩართულობით გამოისყიდოს მოხეს მუსლიმი მრევლის აქამდე არსებული სალოცავის შენობა და გადასცეს მუსლიმთა სამმართველოს. მეორე, შესთავაზოს სოფელ მოხეში ალტერნატიული მიწის ნაკვეთი, მასზე მეჩეთის მშენებლობის უზრუნველყოფისათვის“,-განაცხადა ვაშაყმაძემ.

როგორც სხდომის დასრულების შემდეგ ჟურნალისტებს საქართველოს მუფტიმ ბეგლარ ქამაშიძემ განუცხადა, მუსლიმი თემი განიხილავს წინადადებებს.

“დავსხდებით, დავილაპარაკებთ და ბოლოს შეჯამდება საზოგადოების და მრევლის აზრით გადაწყვეტილება. აქედან გამომდინარე, იმედი მაქვს, რომ იქნება ეს მიღებული საზოგადოების მიერ. და აღარ იქნება ერთხელ და სამუდამოდ ეს პრობლემა მოხის ტერიტორიაზე“,-აღნიშნა ქამაშიძემ.

კომისიის მორიგი სხდომა 1 დეკემბერს ჩაინიშნა, სადაც უკვე მუსლიმი თემის გადაწყვეტილებას განიხილავენ.

მონიკა დავლიანიძე